बेळगाव लाईव्ह :खानापूर तालुक्यातील नंदगड येथे येत्या 12 फेब्रुवारी 2025 रोजी होणाऱ्या श्री महालक्ष्मी यात्रेची पूर्वतयारी व आढावा बैठक काल बुधवारी नंदगड येथील ग्रामपंचायत कार्यालयात पार पडली.
खानापूर तालुक्याचे आमदार विठ्ठलराव हलगेकर यांच्या प्रमुख उपस्थितीत झालेल्या या बैठकीस प्रांताधिकारी श्रवण नाईक, तहसीलदार प्रकाश गायकवाड, ग्रामपंचायत अध्यक्ष यल्लाप्पा गुरव, यात्रा कमिटी अध्यक्ष सुभाष पाटील, डीवायएसपी रवी नाईक, पोलीस निरीक्षक सी. एस. पाटील यांच्यासह केएसआरटीसी, हेस्कॉम, आरोग्य विभाग, अग्निशमन दल, पशुवैद्यकीय व इतर खात्याचे अधिकारी उपस्थित होते.
यावेळी आमदार विठ्ठलराव हलगेकर व उपजिल्हाधिकारी श्रवण नाईक यांनी केएसआरटीसी खानापूर डेपोचे व्यवस्थापक संतोष कांबळे यांना यात्रा काळात बसेसची व्यवस्था सुरळीत करण्याबद्दल सूचना दिल्या. त्यावेळी बेळगाव, खानापूर तसेच तालुक्यातील मुख्य भागातून थेट बस सेवा यात्रा काळात सुरू करण्यात येतील अशी ग्वाही डेपो व्यवस्थापक कांबळे यांनी दिली.
हेस्कॉमचे सहाय्यक कार्यकारी अभियंता जगदीश मोहिते यांना यात्रा काळात विद्युत पुरवठा व्यवस्थित करण्याच्या सूचना देण्यात आल्या. अग्निशमन दलाला एका ठिकाणी जागा देण्यात येणार असून त्या ठिकाणी अग्निशमन च्या गाड्या थांबवण्याची व्यवस्था करण्याचे बैठकीत ठरले. आरोग्य विभागालाही नागरिकांच्या आरोग्याची काळजी घेण्यासंदर्भात विविध सूचना देण्यात आला.
श्री महालक्ष्मी यात्रा काळात भाविकांना व ग्रामस्थांना पाणीपुरवठा व्यवस्थित करण्यासंदर्भात चर्चा करण्यात येऊन निर्णय घेण्यात आले. यावेळी यात्रेशी संबंधित झालेल्या कामांचा आढावा घेण्यात आला.
बैठकीस नंदगडचे ज्येष्ठ नेते पी. के. पाटील, पीएलडी बँकेचे माजी चेअरमन विजय कामत, लक्ष्मण बोटेकर, शंकर सोनोळी, ग्रामपंचायत सदस्य, नंदगड यात्रा कमिटी सदस्य व पंच कमिटी उपस्थित होती.
