बेळगाव लाईव्ह :अनगोळ येथील छत्रपती संभाजी महाराज स्मारक अनावरणाप्रसंगी ‘जय महाराष्ट्र’ घोषणा दिल्याबद्दल महाराष्ट्राचे मंत्री शिवेंद्रसिंह राजे भोसले यांच्यासह स्थानिक लोकप्रतिनिधी व महापौरांवर यांच्यावर राजद्रोहाचा गुन्हा दाखल करावा, अशी मागणी कित्तूर कर्नाटक सेने या कन्नड संघटनेने जिल्हाधिकाऱ्यांकडे केली आहे.
कित्तूर कर्नाटक सेनेच्या पदाधिकारी व कार्यकर्त्यांनी उपरोक्त मागणीचे निवेदन आज मंगळवारी सकाळी जिल्हाधिकाऱ्यांना सादर केले. बेळगाव शहरातील अनगोळ येथील धर्मवीर संभाजी महाराज मूर्ती उद्घाटना संदर्भात आपण स्वतः भेट देऊन पाहणी केल्यानंतर रविवारी 5 जानेवारी रोजी कोणीही मूर्ती स्थळाच्या ठिकाणी जमून मूर्तीचे उद्घाटन करू नये असा आदेश जारी केला होता.
तथापि मूर्ती स्थळाचे बांधकाम अपूर्ण असताना देखील राजकीय लाभ मिळविण्याच्या दूरूद्देशाने नियमांचे उल्लंघन करून मूर्तीचे उद्घाटन करण्यात आले. त्याचा आम्ही निषेध करतो. उद्घाटना समारंभास महाराष्ट्राचे मंत्री शिवेंद्रसिंह राजे भोसले यांना निमंत्रित करून त्यांच्याकडून ‘जय महाराष्ट्र’ ही घोषणा करवून राजद्रोह करण्यात आला आहे.
मंत्री भोसले यांनी जय महाराष्ट्र म्हंटल्यानंतर स्थानिक लोकप्रतिनिधी आणि महापौरांनी टाळ्या वाजवून हर्ष व्यक्त केला. हा कर्नाटकच्या जनतेचा केलेला अपमान आहे.
तेंव्हा मंत्री भोसले यांच्यासह या तिघांवर देखील राजद्रोहाचा गुन्हा दाखल करावा अशा आशयाचा तपशील कित्तूर कर्नाटक सेने या कन्नड संघटनेने जिल्हाधिकाऱ्यांना सादर केलेल्या निवेदनात नमूद आहे.
