बेळगाव लाईव्ह :बेळगाव तालुक्यातील कंग्राळी बुद्रुक ग्रामपंचायत अध्यक्षा कैसर बंदेनवाज सय्यद यांच्या विरोधातील अविश्वासाचा ठराव आज शुक्रवारी झालेल्या मतदानात सर्वानुमते संमत करण्यात आला असून नव्या अध्यक्षांची निवड येत्या 8-10 दिवसात केली जाईल, अशी माहिती निवडणूक अधिकारी तथा बेळगाव उपजिल्हाधिकारी दिनेशकुमार मीना यांनी दिली.
बेळगाव तालुक्यातील कंग्राळी बुद्रुक ग्रामपंचायत अध्यक्षा कैसर बंदेनवाज सय्यद यांच्या विरोधात अविश्वासाचा ठराव मांडण्यात आला होता. त्यावर आज शुक्रवारी निर्णय घेण्यात आला. यावेळी झालेल्या मतदानात 34 सदस्यांपैकी 27 ग्रामपंचायत सदस्यांनी अध्यक्षा कैसर बंदेनवाज सय्यद यांच्या विरोधात हात उंचावून मतदान करण्याद्वारे अविश्वासाचा ठराव मंजूर केला.
मतदानाप्रसंगी उर्वरित 7 ग्रामपंचायत सदस्य गैरहजर होते. बहुमताने अविश्वासाचा ठराव मंजूर झाल्याचे घोषित केल्यानंतर बोलताना कंग्राळी बुद्रुक ग्रामपंचायत अध्यक्षांचे स्थान रिक्त आहे ही माहिती जिल्हाधिकाऱ्यांकडे पाठवले जाईल.
तसेच पुढील नवीन अध्यक्षांसाठी येत्या आठ-दहा दिवसात निवडणूक घेतली जाईल, असे निवडणूक अधिकारी मीना यांनी स्पष्ट केले. अध्यक्षांवरील अविश्वासाच्या ठरावाचे कारण स्पष्ट करताना, गेले सहा-सात महिने अध्यक्ष सय्यद या ग्रामपंचायतीकडे फिरकल्याच नव्हत्या.
त्यामुळे कंग्राळी बुद्रुक गावाचा विकास खुंटला होता. कोणतेही काम पूर्ण होत नसल्यामुळे कैसर बंदे नवाज सय्यद यांना अध्यक्षपदावरून हटवावे लागल्याचे ग्रामपंचायत सदस्य जयराम पाटील व अनिल पावशे यांनी मतदान प्रक्रियेनंतर बोलताना सांगितले.
