बेळगाव लाईव्ह :विविध नेते व कन्नड संघटनांबरोबरच आता बेळगाव महापालिकेतील नगरसेवक हुबळी -धारवाड येथील औद्योगिक वसाहतीला हिडकल धरणातील पाणी देण्यास विरोध करण्याच्या तयारीत असताना बेळगाव उत्तरचे आमदार असिफ (राजू) सेठ यांनी आपली भूमिका स्पष्ट केली आहे. त्यांनी प्रथम बेळगाव शहराच्या पाणी पुरवठ्याचे नियोजन करा त्यानंतरच हुबळी -धारवाड औद्योगिक वसाहतीला हिडकलचे पाणी देण्याचा विचार करा, असे मत व्यक्त केले आहे.
हिडकल जलाशयापासून 80 कि.मी. लांबीची जलवाहिनी घालून हुबळी -धारवाड औद्योगिक वसाहतीला पाणी पुरवठा करण्याचा निर्णय घेण्यात आला आहे. मात्र त्याला मोठ्या प्रमाणात विरोध केला जात आहे. हिडकल धरणाची क्षमता 51 टीएमसी असून या धरणातून दररोज बेळगाव, हुक्केरी, संकेश्वर शहरांसह हुक्केरी तालुक्यातील बहुतांश गावांना पाणीपुरवठा केला जातो.
या खेरीज विजापूर आणि बागलकोट जिल्ह्यातील गावांना देखील पाणी पुरवले जाते. मात्र आता या धरणातून हुबळी -धारवाड औद्योगिक वसाहतीला पाणीपुरवठा करण्याचा निर्णय घेण्यात आल्यामुळे भविष्यात सध्या पाणीपुरवठा होत असलेल्या बेळगावसह अन्य भागात पाण्याची गंभीर समस्या निर्माण होण्याची शक्यता व्यक्त केली जात आहे.
त्यामुळे विविध कन्नड संघटनांनी तसेच नेते मंडळींनी त्याला तीव्र विरोध करण्यास सुरुवात केली आहे. माजी पालकमंत्री शशिकांत नाईक यांनी तर हुबळी -धारवाड येथील औद्योगिक वसाहतींसाठी हिडकल धरणातील पाणी घेऊन जाणे हे बेळगाव, बागलकोट आणि विजापूर जिल्ह्यासाठी घातक आहे.
त्यामुळे हिडकल धरणा ऐवजी म्हादई (कळसा -भांडुरा प्रकल्प) प्रकल्पाचे काम लवकर पूर्ण व्हावे त्यासाठी प्रयत्न करा. तसेच म्हादाई योजनेतून हुबळी -धारवाड औद्योगिक वसाहतीला पाणी द्या, अशी मागणी केली आहे.
बेळगाव महानगरपालिकेतील नगरसेवक देखील हुबळी -धारवाड औद्योगिक वसाहतीला हिडकलचे पाणी देण्यास विरोध करण्यासाठी सज्ज झाले आहेत. या सर्व पार्श्वभूमीवर बेळगाव उत्तरचे आमदार असिफ (राजू) सेठ यांनी देखील आपली भूमिका स्पष्ट केली आहे. बेळगाव शहर परिसरासाठी प्रथम हिडकल धरणातील पाण्याचे नियोजन करा. त्यानंतरच हुबळी -धारवाड औद्योगिक वसाहतीला पाणी पुरवठा करण्याचा विचार केला जावा, असे हा मत त्यांनी व्यक्त केले आहे.
