बेळगाव लाईव्ह : बेळगावमधील वडगाव येथील मायलेकींचा प्रयागराज येथील कुंभमेळ्यात झालेल्या चेंगराचेंगरीत दुर्दैवी अंत झाला. आज त्यांचे मृतदेह विमानाने बेळगावमध्ये आणण्यात येत असून मेघा आणि ज्योती हत्तरवाट यांच्या घरातील श्वानाला देखील त्यांच्या जाण्याचा चटका जिव्हारी लागला आहे.
बुधवारी दुपारी मायलेकींच्या निधनाचे वृत्त येताच हत्तरवाट कुटुंबियांवर शोककळा पसरली. संपूर्ण कुटुंब दुःखाच्या छायेत असताना याच घरातील श्वानाला देखील मायलेकींच्या जाण्याने धक्का बसला आहे.
प्रयागराज महाकुंभमेळ्यात मृत्युमुखी पडलेल्या मायलेकींच्या निधनाची वार्ता ऐकून हत्तरवाट कुटुंबियांवर दुःखाचा डोंगर कोसळला. ही बातमी घरच्यांसाठी जितकी हादरवणारी होती, तितकीच ती त्यांच्या लाडक्या सनी श्वानासाठीही हादरवणारी होती.
प्रयागराज येथील कुंभमेळ्यासाठी मायलेकी बेळगावमधून रवाना होताच सनी अस्वस्थ झाला. त्याने खाणे-पिणे सोडले. घरातील वातावरण बदलल्याचे त्याला जाणवत होता. जेव्हा अचानक त्यांच्या मृत्यूची बातमी आली, तेव्हा सनी एकटाच कोपऱ्यात जाऊन बसला. आपल्यावर जीव लावणाऱ्या व्यक्ती आपल्याला दिसणार नाहीत याची जाणीव त्याला जणू आधीच झाली होती, अशा भावनेत सनी बसल्याचे दिसून आले.
मृत मेघा या तरुणीची बहीण मानसी हिने याबद्दल बोलताना सांगितले, सनीच्या वागण्याकडे आम्ही दुर्लक्ष केलं. पण पुढे काही अघटित घडणार आहे, याची जाणीव त्याला आधीच झाली होती….! अजूनही सनी दोन्ही मायलेकींच्या वाटेकडे नजर खिळवून बसला आहे. हे अगतिक चित्र प्रत्येकाच्याच डोळ्याच्या कडा पाणवणारं ठरतंय हे नक्की……!
