बेळगाव लाईव्ह : सरकारच्या मुख्य सचिव डॉ. शालिनी रजनीश यांनी बुधवारी बेळगावमधील कुमारस्वामी लेआउट येथे इकोफिक्स या नाविन्यपूर्ण डांबरी उत्पादनाच्या प्रात्यक्षिकाचे परीक्षण केले.
रस्ते बांधणी आणि दुरुस्तीसाठी उपयुक्त असलेले हे उत्पादन अलिकडच्या काळात खूप प्रभावी ठरत आहे. डॉ. शालिनी रजनीश यांनी या तंत्रज्ञानाचा वापर कसा अधिक व्यापक प्रमाणावर करता येईल यावर चर्चा केली आणि उपस्थितांना त्याचा अधिकाधिक उपयोग करण्याचे निर्देश दिले.
या प्रात्यक्षिकामुळे शहरी आणि ग्रामीण भागातील रस्ते समस्यांचे जलद निराकरण होण्यास मदत होईल, असेही त्यांनी यावेळी सांगितले. इकोफिक्सच्या प्रभावी परिणामांमुळे भविष्यात हे तंत्रज्ञान अधिक प्रमाणात स्वीकारले जाण्याची शक्यता आहे.
इकोफिक्स ही आधुनिक तंत्रज्ञान प्रणाली कोणत्याही प्रकारच्या हवामानात वापरता येते. विशेषतः पावसाळ्यात आणि तीव्र उष्णतेतही तिची उपयुक्तता कायम राहते. खड्डे बुजवण्यासाठी ही पद्धत जलद, प्रभावी आणि दीर्घकाल टिकणारी असल्याचे नमूद करण्यात आले. इकोफिक्सच्या तज्ञांनी या उत्पादनाचे विविध उपयोग स्पष्ट केले.
रस्त्यांची दुरुस्ती, महामार्ग व पुलांची देखभाल, लहान-मोठ्या खड्ड्यांवर डागडुजी, पार्किंग लॉटचे बांधकाम, तसेच इतर पायाभूत सुविधा प्रकल्पांमध्ये या तंत्रज्ञानाचा उपयोग कसा होतो याचे सविस्तर स्पष्टीकरण देण्यात आले.
या कार्यक्रमास महापौर सविता कांबळे, सार्वजनिक बांधकाम विभागाचे अधिकारी एस.एस. साबरद, शहर अधिकारी संदीप जिरग्याळ, तसेच इतर महापालिका कर्मचारी आणि अधिकारी उपस्थित होते.
