बेळगाव लाईव्ह :बेळगाव लाईव्ह : बेळगाव लोकसभा मतदार संघाचे खासदार जगदीश शेट्टर यांनी केंद्रीय रेल्वे मंत्री अश्विनी वैष्णव यांच्याकडे वंदे भारत सेवेच्या विस्ताराबाबत लेखी प्रश्न विचारला होता.
यावर रेल्वे मंत्र्यांनी लेखी उत्तर दिले असून, ते उत्तर अधिकतर सामान्य स्वरूपाचे होते. खासदार शेट्टर यांच्या थेट प्रश्नांना उत्तर न देण्यात आल्याने काही शंका उपस्थित झाल्या आहेत.
खासदार जगदीश शेट्टर यांनी वंदे भारत सेवा बेळगाव-बेंगळुरू मार्गावर सुरू करणे, हुबळी -पुणे मार्गावर सेवा वाढवणे असे मुद्दे मांडले होते. यावर केंद्रीय रेल्वेमंत्री अश्विनी वैष्णव यांनी उत्तर दिले की, बेंगळुरू-बेळगाव मार्गावर सध्या 15 जोड्या नियमित रेल्वे सेवा कार्यरत आहेत, आणि पुणे-हुबळी मार्गावर 17 नियमित रेल्वे सेवा कार्यरत आहेत, त्यात वंदे भारत एक्सप्रेस समाविष्ट आहे.
हुबळी -पुणे मार्गावर 3 दिवस वंदे भारत एक्सप्रेस धावते. याशिवाय पुणे-हब्बाळी मार्गावर एक विशेष ट्रेन देखील धावते. वंदे भारत सेवा वाढवण्याबाबत निर्णय संसाधनांच्या उपलब्धतेवर, कार्यक्षमतेवर आणि वाहतुकीच्या गरजांवर आधारित घेतला जातो. वाढीव सेवांबाबत निर्णय घेतला जातो, परंतु त्यासाठी अनेक घटकांचा विचार केला जातो.
प्रवाशांच्या आवश्यकतेनुसार आणि कार्यक्षमतेनुसार सेवांची पुनरावलोकन व समायोजन होईल, असेही केंद्रीय रेल्वेमंत्र्यांनी नमूद केले आहे. विशेषतः, बेंगळुरू-बेळगाव मार्गावर वंदे भारत सेवा सुरू करण्याबाबत आणि हुबळी-पुणे मार्गावर वंदे भारत एक्सप्रेसच्या वारंवारतेसाठी तारीख ठरवण्याबाबत, मंत्र्यांनी स्पष्ट उत्तर देण्यात टाळाटाळ केली. यावरून खास. शेट्टर यांच्या विशिष्ट प्रश्नांची थेट उत्तरे दिली गेली नाही,असे दिसून येत आहे.
रेल्वे मंत्रालयाने वंदे भारत सेवा विस्ताराबाबत सध्याच्या परिस्थितीवर आधारित उत्तर दिले असून यामध्ये खासदार शेट्टर यांच्या प्रश्नांची थेट आणि स्पष्टीकरणात्मक उत्तरे दिली नाहीत, हेच यावरून स्पष्ट होते. यामुळे वंदे भारताच्या विस्तारासाठी आणखी प्रतीक्षा करावी लागणार हे निश्चित आहे.
