बेळगाव लाईव्ह : बेळगाव तालुक्यातील सात ग्रामपंचायतींमध्ये रिक्त झालेल्या आठ जागांसाठी पोटनिवडणूक होत असून, एकूण 23 इच्छुकांनी अर्ज दाखल केले आहेत.
मंगळवारी अर्ज दाखल करण्याची अंतिम मुदत संपली. अर्ज माघारीसाठी शुक्रवार, 15 नोव्हेंबर ही अंतिम तारीख आहे. अर्ज माघारीनंतर लढतीचे अंतिम स्वरूप स्पष्ट होणार आहे.
मारिहाळ, बस्तवाड, बेकिनकेरे, बेनकनहळ्ळी, संतिबस्तवाड, कंग्राळी खुर्द, आणि होनगा या सात ग्रामपंचायतींमध्ये विविध कारणांनी रिक्त झालेल्या सदस्य पदांसाठी पोटनिवडणूक होत आहे.
या निवडणुकीत ग्रामपंचायतीच्या पाच वर्षांच्या कार्यकाळातील उर्वरित एक-दीड वर्षाचा कार्यकाळ पूर्ण करण्यासाठी ही पदे भरली जाणार आहेत. मतदान 23 नोव्हेंबर रोजी पार पडणार असून, मतमोजणी 26 नोव्हेंबर रोजी होईल.
हुक्केरी तालुक्यातील मावनूर, शिरढाण, गुडस, केरुर, चंदूर, करोशी, नेज, निडगुंदी, शिरुर, शिरहट्टी, अरटाळ, उडीकेरी, हन्नीकेरी, वन्नूर, गोवणकोप्प, मरकट्टी, हिरेकुंबी आणि हिरेकोप्प के. एच. येथील ग्रामपंचायतींमध्येही पोटनिवडणुकीची प्रक्रिया सुरू आहे.
