बेळगाव लाईव्ह : बेळगावमधील रोटरी क्लबने लष्करी भरती मेळाव्यात सहभागी होण्यासाठी देशभरातून आलेल्या हजारो युवकांसाठी अन्न आणि पाण्याचे वितरण करून एक अनुकरणीय मानवतावादी उपक्रम राबवला.
देशाच्या विविध भागांतून जवळपास 20,000 युवकांनी बेळगावात लष्करी भरती मेळाव्यात सहभाग घेतला होता. अन्न, पाणी आणि राहण्याच्या सुविधा मिळण्यात आलेल्या अडचणींमुळे हे युवक कठीण परिस्थितीला सामोरे जात होते.
या कठीण प्रसंगाची जाण ठेवून रोटरी क्लब ऑफ बेळगावने सामाजिक बांधिलकी दाखवत युवकांना अन्न आणि पाण्याचे वितरण केले. या उपक्रमाअंतर्गत तीन दिवसांत 2,000 हून अधिक युवकांना गरम आणि पोषक जेवण देण्यात आले. त्याचप्रमाणे, युवकांच्याआरोग्याची काळजी घेत इलेक्ट्रॉल पावडरची पाकिटे, ताकाचे पॅक आणि फळांचे शौर्य सर्कल येथे वाटप करण्यात आले.
रोटरी जिल्हा गव्हर्नर शरद पै यांनी जिल्हा गव्हर्नर निधीतून रु. 60,000 ची मदत करून या प्रकल्पाला चालना दिली. रोटरी क्लबच्या या उपक्रमाची लष्करी अधिकाऱ्यांनीही प्रशंसा केली.
रोटरी क्लबच्या सदस्यांनी नेहमीप्रमाणे उदार अंतःकरणाने पुढाकार घेतला, ज्यामुळे या युवकांना मानसिक व शारीरिक आधार मिळाला.
या प्रकल्पाचे नेतृत्व रोटरीचे जिल्हाध्यक्ष सुहास चिंडक आणि सचिव डॉ. मनीषा हेरेकर यांनी केले. यामध्ये माजी जिल्हा गव्हर्नर अविनाश पोटदार, अजीत सिध्दनावर, कर्नल हेगडे, संतोष पावटे, जीवन खटाव, मनोज हुळगोल, संदीप नाईक, प्रताप नलवडे, विक्रांत कुदळे, डॉ. संतोष पाटील, लक्ष्मीकांत नेतलकर, सतीश नेतलकर, शील मिर्जी, अशोक पै, मनोज पै यांचा सक्रिय सहभाग होता. रोटरी क्लबच्या या मानवतावादी उपक्रमाने एक सामाजिक प्रेरणा दिली आहे.
