बेळगाव लाईव्ह : मुडा घोटाळ्याप्रकरणी न्यायालयाने दिलेल्या आदेशानंतर नैतिक जबादारी स्वीकारून मुख्यमंत्री सिद्धरामय्या यांनी आपल्या पदाचा राजीनामा द्यावा, अशी मागणी करत आज बेळगाव जेडीएसच्या वतीने निदर्शने करण्यात आली.
राणी कित्तूर चन्नम्मा चौकात आज जेडीएस जिल्हाध्यक्ष शंकर माडलगी यांच्या नेतृत्वाखाली छेडण्यात आलेल्या आंदोलनात उपरोक्त मागणी करत जोरदार घोषणाबाजी करण्यात आली. मुख्यमंत्र्यांनी संपूर्ण राज्याला नैतिकतेची शिकवण दिली. याच नैतिकतेनुसार त्यांनी आपल्या पदाचा राजीनामा द्यावा.
मुख्यमंत्र्यांनी आपल्या पदाचा, सत्तेचा गैरवापर केल्याचे स्पष्ट झाले असून याबाबत न्यायालयाने आता निर्णय दिला आहे. नैतिक मूल्ये पायदळी तुडवणाऱ्या मुख्यमंत्र्यांनी राजीनामा न दिल्यास उग्र आंदोलन करण्यात येईल, असा इशारा यावेळी आंदोलकांनी दिला.
या आंदोलनात जेडीएसचे जिल्हाध्यक्ष शंकर माडलगी, मारुती अष्टगी, प्रमोद पाटील, यांच्यासह मोठ्या संख्येने जेडीएस नेते, कार्यकर्ते सहभागी झाले होते.
