बेळगाव लाईव्ह :हाती भगव्या पताका, टाळ मृदुंगाचा गजर, डोक्यावर तुळशी वृंदावन घेतलेल्या महिला, मुखी विठ्ठलाचे नामस्मरण आणि मध्यभागी माऊलींची पालखी अशा मंगलमय वातावरणात वैष्णव सदन आश्रम येळ्ळूर- धामणे ते श्री क्षेत्र पंढरपूर पायी दिंडीचे येळ्ळूर येथून काल सकाळी प्रस्थान झाले.
दरवर्षी बेळगाव सीमा भागातून शेकडो दिंड्या विठुरायाच्या दर्शनासाठी पंढरपूरला जात असतात. येळ्ळूर- धामणे पंचक्रोशीतील दिंडी देखील काल शुक्रवारी सकाळी पंढरपूरला रवाना झाली.
ग्रामदेवता श्री चांगळेश्वरी देवी मंदिरात पालखी पूजन करून त्यानंतर विणेकरी, टाळकरी, मानाचा अश्व, मानदंड धरणारे मानकरी आणि विठ्ठल नामाचा गजर करणारे वारकरी अशी पायी दिंडी सुरू झाली. अत्यंत शिस्तबद्ध पद्धतीने भजन, कीर्तन करीत येळ्ळूर येथून मार्गस्थ झालेली ही पायी दिंडी साऱ्यांचे लक्ष वेधून घेत होती.
या भव्य दिंडीमध्ये पंचक्रोशीतील, येळ्ळूर, नागुर्डा, हलगा, मुतगा, धामणे, ब्रम्हगट्टी, मासगौंडहट्टी, देवगणहट्टी, अवचारहट्टी, सुळगे(ये.), देसुर, राजहंस गड, नंदिहळळी, नागेनहट्टी, कोंडस्कोप, इदलहोंड, तोपिनकट्टी, रामगुरवाडी, मंडोळी, होनाकल, माचीगड, जुनेबेळगांव, वडगांव शहापूर आणि बेळगाव येथील वारकऱ्यांचा समावेश आहे.
बेळगावात दाखल झालेल्या या दिंडी प्रसंगी बेळगाव लाईव्हशी बोलताना वैष्णव सदन येळ्ळूर-धामणे ते पंढरपूर पायी दिंडीचे अध्यक्ष बाळू केरवाडकर यांनी सांगितले की गेल्या 15 वर्षांपासून आमची ही पायी दिंडी सुरू आहे. हरिभक्त पारायण दिवंगत तुकाराम महाराज मुरगोड हे या दिंडीचे संस्थापक असून त्यांनी या दिंडीला बेळगाव तालुक्यात एक महत्त्वाचे स्थान मिळवून दिले आहे.
फक्त नामस्मरण करणाऱ्या तुकाराम महाराज मुरगोड यांनी सुमारे 35 ते 38 वर्षे मौन पालनाचे खडतर व्रत केले होते. त्यांच्या आशीर्वादाने ही पायी दिंडी सुरू आहे. सदर दिंडी मौनानंद हभप तुकाराम महाराज मुरगूड यांच्या सानिध्यात सुरू झाल्यामुळे तिला बेळगाव तालुक्यात अनन्य साधारण महत्त्व आहे. त्यामुळे खानापूर व बेळगाव तालुक्यातील महाराजांना मानणारे भक्त, वारकरी वगैरे सर्वजण या दिंडीत मोठ्या संख्येने सहभागी होत असतात.
