बेळगाव लाईव्ह :हेस्कॉमकडून अनगोळ येथील शिवारातील बस्ट होऊन निकामी झालेल्या विद्युत ट्रान्सफॉर्मरच्या (टीसी) ठिकाणी आज सोमवारी सकाळी नवा विद्युत ट्रान्सफॉर्मर बसविण्यात आल्यामुळे परिसरातील शेतकऱ्यांमध्ये समाधान व्यक्त होत आहे.
अनगोळ शिवारातील बाळेकुंद्री यांच्या शिवारातील टिसी मागच्या कांही दिवसापूर्वी अचानक शॉर्ट होऊन बष्ट झाला होता. परिणामी विजे अभावी गैरसोय होत असल्यामुळे परिसरातील शेतकऱ्यांनी अनगोळ शिवारातील टीसी ताबडतोब सुरू करण्याची मागणी केली होती.
तसेच आपल्या मागणीची पूर्तता न झाल्यास हेस्कॉम कार्यालयावर धडकण्याचा इशारा दिला होता परिस्थिती आहे. यासंदर्भात बेळगाव लाईव्हने देखील वृत्त प्रसिद्ध केले होते. याची दखल घेत हेस्कॉमचे कर्मचारी नव्या टीसीसह आज सोमवारी सकाळी अनगोळ शिवाराच्या ठिकाणी दाखल झाले.
मात्र शेतात भात पीक असल्याने टीसी त्याच्या जागेपर्यंत घेऊन जाणे अडचणीचे होते. तथापि शेतकरी हेस्कॉम कर्मचाऱ्यांच्या मदतीला धावले त्यांनी एका बैलगाडीतून नवा टीसी बाळेकुंद्री यांच्या शेतामध्ये आत असलेल्या विजेच्या खांबापर्यंत वाहून नेला.
त्यानंतर कर्मचाऱ्यांनी शेतातील नादुरूस्त टिसी काढून त्या जागी नवा टीसी बसविला. या पद्धतीने हेस्कॉमने आपल्या मागणीची दखल घेऊन नव्या विद्युत ट्रान्सफॉर्मरची सोय केल्यामुळे परिसरातील शेतकऱ्यात समाधान व्यक्त होत आहे.
दरम्यान, दरवेळी अनगोळ शिवारातील बाळेकुंद्री यांच्या शेतातील टिसी खराब झाल्यास तो दुरुस्त करणे अडचणीचे ठरत असते. हे लक्षात घेऊन हेस्कॉम कर्मचाऱ्यांचे रिपेरीचे काम सोपे जावे आणि शेत पिकांचेही नुकसान होऊ नये यासाठी बाळेकुंद्री यांच्या शेतातील टिसी काढून येळ्ळूर, शहापूर सीमेवर रस्त्याच्या बाजूला उभारण्याच्या आपल्या पूर्वीच्या मागणीचा आता पुन्हा पाठपुरावा करण्याचा निर्णय शेतकऱ्यांनी घेतला आहे.
