बेळगाव लाईव्ह :गेल्या चार महिन्यात महाराष्ट्राच्या विविध भागात दुचाकी लंपास करणाऱ्या चोरट्यांच्या त्रिकुटाला पोलिसांनी गजाआड केले असून त्यांच्याकडील 6 लाख 60 हजार रुपये किमतीच्या दहा दुचाकी जप्त केल्या आहेत.
हुकेरी तालुक्यातील सोलापूर गावातील सुनील राजेंद्र मुरगुडे (वय 23), पृथ्वी बसवराज खोत (वय 23) आणि उदय महारुद्र गणाचारी (वय 19) अशी पोलिसांनी ताब्यात घेतलेल्या आरोपींची नावे आहेत.
निपाणी ग्रामीण पोलीस ठाण्याचे पोलीस उपनिरीक्षक शिवराज नायकवाडी हे गेल्या जुलै 19 रोजी सायंकाळी आपल्या पोलीस ठाण्याच्या व्याप्तीत विशेष कर्तव्य पार पाडत होते.
त्यावेळी चोरी केलेल्या एका दुचाकीवरून जाणाऱ्या उपरोक्त तिघा जणांना त्यांनी अडविले. तसेच पोलीस ठाण्यात नेऊन त्यांची चौकशी केली असता त्यांनी आपण दुचाकी चोरटे असल्याची कबुली दिली.
त्यानंतर पोलिसांनी तिघा आरोपींकडील महाराष्ट्रातील विविध ठिकाणाहून चोरलेली सुमारे 6 लाख 60 हजार रुपये किमतीची 10 दुचाकी वाहने जप्त केली आहेत. याप्रकरणी निपाणी ग्रामीण पोलीस ठाण्यात गुन्हा नोंद झाला आहे