पंतप्रधानांच्या सभेनंतर वाहनांच्या गर्दीमुळे चक्काजाम

बेळगाव लाईव्ह :पंतप्रधान नरेंद्र मोदी यांच्या मालिनी सिटी येथील प्रचार सभेनंतर राष्ट्रीय महामार्ग क्र. 4 वर वाहनांची एकच गर्दी होऊन अलारवाडी ब्रिज जवळ तसेच या ठिकाणच्या सर्व्हिस रोडवर मोठ्या प्रमाणात वाहतूक कोंडी होऊन चक्काजाम झाल्याची घटना आज दुपारी घडली.

बेळगाव आणि चिक्कोडी लोकसभा मतदार संघातील भाजप उमेदवार अनुक्रमे जगदीश शेट्टर व अण्णासाहेब जोल्ले यांच्या प्रचारार्थ आज रविवारी सकाळी मालिनी सिटी बेळगाव येथे पंतप्रधान नरेंद्र मोदी यांची सभा आयोजित करण्यात आली होती. यासाठी शहर परिसरातील काही मार्गांवरील वाहतूक व्यवस्थित बदल करण्यात आला होता.

त्याचप्रमाणे सभेच्या ठिकाणी जाणारे मार्ग रोखण्यात आले होते. पंतप्रधान मोदी यांची प्रचार सभा समाप्त होताच रोखण्यात आलेले हे मार्ग पुन्हा खुले करण्यात आले. परिणामी सुवर्णविधान सौधच्या ठिकाणी असलेल्या राष्ट्रीय महामार्ग क्र. 4 वर वाहनांची एकच गर्दी झाली.

त्यामुळे अलारवाड ब्रिज जवळ वाहतूक कोंडीची समस्या निर्माण होऊन महामार्गाच्या दोन्ही बाजूला वाहनांच्या लांब रांगा लागल्याचे चित्र दुपारी पहावयास मिळाले. वाहन चालक मिळेल त्या मार्गाने इच्छित स्थळी जाण्याच्या प्रयत्नात असल्यामुळे महामार्ग शेजारील सर्व्हिस रोडवर देखील वाहतूक कोंडी झाली होती.

राष्ट्रीय महामार्गावरील वाहतूक कोंडी सुटून रहदारी सुरळीत होण्यासाठी विलंब लागल्यामुळे वाहन चालकात नाराजी व्यक्त होताना दिसत होती.