बेळगाव लाईव्ह :बेळगाव ते पुणे मार्गावर एकीकडे इंटरसिटी एक्सप्रेससाठी प्रयत्न सुरू असतानाच भाजप खासदार इराण्णा कडाडी यांनी या मार्गासाठी केलेल्या ‘वंदे भारत’च्या मागणीवर केंद्रीय रेल्वेमंत्री अश्विनी वैष्णव यांनी विद्युतीकरण काम पूर्ण झाल्यानंतर विचार करू असे आश्वासन दिले आहे. दुसरीकडे इंटरसिटी एक्सप्रेसची मागणीही दुर्लक्षित केली आहे. त्यामुळे ‘तेलही गेले आणि तूपही’ अशी अवस्था बेळगावसह मध्य रेल्वे अंतर्गत येणाऱ्या महत्त्वाच्या स्थानकांची झाली आहे.
पुणे ते बेळगाव दरम्यान इंटरसिटी एक्सप्रेस रेल्वे सुरू करण्याचा प्रयत्न होत आहे. मात्र आता राज्यसभा सदस्य इराण्णा कडाडी यांनी सदर मार्गासाठी ‘वंदे भारत’ ची मागणी केली आहे. त्यावर रेल्वेमंत्र्यांनी केवळ विद्युतीकरणाच्या अपूर्ण कामाचा मुद्दा रेटत हे काम पूर्ण होताच ‘वंदे भारत’ सुरू करण्याबाबत विचार करू असे पोकळ आश्वासन दिले आहे.
यामुळे दुसरीकडे इंटरसिटी एक्सप्रेसचा मुद्दाही बारगळला आहे. एकीकडे सांगलीचे खासदार संजय पाटील यांनी इंटरसिटी एक्सप्रेस वंदे भारत साठी मागणी केली होती दुसरीकडे बेळगाव जिल्ह्यातील खासदार इराण्णा कडाडी यांनीही ‘वंदे भारत’ बाबत प्रश्नचिन्ह उपस्थित केले. भाजपच्या या दोन खासदारांनी केलेल्या मागणीला केंद्राकडून वाटण्याच्या अक्षता दिल्या गेल्याने प्रवाशातून संताप व्यक्त होत आहे.
मध्य रेल्वे प्रशासनानेच इंटरसिटी एक्सप्रेस साठी प्रस्ताव दिला होता मात्र वंदे भारतची मागणी रेटली गेल्यानंतर केंद्रीय रेल्वे प्रशासनाकडून दोन्ही मागण्यांना प्रतीक्षा कक्षात ठेवण्यात आले आहे. त्यामुळे प्रवाशांना यापैकी कोणतीही गाडी सुरू होण्यासाठी किमान वर्षभराची प्रतीक्षा करावी लागणार आहे.
बेळगाव -पुणे वंदे भारत एक्सप्रेस सुरू होण्यासाठी आणखी एक ते दीड वर्षाचा कालावधी लागण्याची शक्यता आहे बेळगाव -पुणे दरम्यानच्या रेल्वे विद्युतीकरण कामासाठी अद्याप सहा महिन्यांचा कालावधी लागणार असून त्यानंतर ‘वंदे भारत’ सुरू करायची झाल्यास आणखी सहा महिन्याचा कालावधी लागू शकतो.
प्रत्यक्षात ही गाडी धावण्यासाठी 2025 हे वर्ष उजाडू शकते. त्यामुळे त्याआधी किमान तुर्तास पुणे -बेळगाव इंटरसिटी किंवा जनशताब्दी एक्सप्रेस सुरू करण्यात यावी, अशी प्रवाशांची जोरदार मागणी आहे.
