बेळगाव लाईव्ह : रहदारी पोलिसांकडून आरपीडी कॉलेज रोड, आरपीडी सर्कल आणि देशमुख रोड या ठिकाणी दुतर्फा होणारे वाहनांचे पार्किंग हटविल्यामुळे दोन्ही रस्ते प्रशस्त वाटू लागल्याने नागरिकात समाधान व्यक्त होत आहे.
सदर तीनही ठिकाणी गेल्या काही वर्षांपासून रस्त्याच्या दुतर्फा वाहने पार्क केली जात होती. त्यामुळे वाहतुकीस अडथळा निर्माण होत होता.
दोन्ही बाजूला वाहने पार्क झाल्यामुळे रस्ता चिंचोळा होऊन विशेष करून आरपीडी सर्कल येथे देशमुख रोड आणि दुसऱ्या बाजूला कॉलेज रोड या ठिकाणी बऱ्याचदा वाहतूक कोंडीची समस्या निर्माण होत होती.
याची दखल घेऊन रहदारी पोलिसांनी नुकतेच या ठिकाणचे दुतर्फा पार्किंग हटविण्याबरोबरच दुचाकी वाहनांच्या पार्किंगला शिस्त लावली आहे. परिणामी आखुडलेले देशमुख रोड आणि कॉलेज रोड हे मार्ग आता प्रशस्त वाटू लागले असून या रस्त्यावरून जाणाऱ्या नागरिकांनीही मोकळा श्वास घेतला आहे.
रहदारी विभागाने घेतलेल्या या निर्णयाबद्दल परिसरातील नागरिक आणि दुकानदारांकडून समाधान व्यक्त केले जात आहे.
