बेळगाव लाईव्ह :सौंदत्ती येथील श्री यल्लमा (रेणुका) देवीच्या शाकंभरी यात्रेसाठी बेळगाव, कर्नाटक आणि गोवा राज्यातील जवळपास 6 लाख भाविकांची सध्या डोंगरावर तोबा गर्दी झाली आहे. शाकंभरी यात्रेचा आजचा गुरुवार हा मुख्य दिवस असल्यामुळे सौंदत्ती डोंगर परिसर गर्दीने फुलून गेला आहे.
श्री रेणुका देवी मंदिर प्रशासनातर्फे यात्रा काळात भाविकांना त्रास होऊ नये यासाठी विविध उपाययोजना करण्यात आल्या आहेत. शाकंभरी यात्रेसाठी गेल्या चार-पाच दिवसांपासून विविध भागातील भाविकांनी डोंगरावर गर्दी केली आहे. तसेच आपल्या परंपरेप्रमाणे विविध धार्मिक कार्यक्रम करण्यासह इतर विधी केले जात आहेत.
सौंदत्ती डोंगरावरील यात्रा प्रामुख्याने पौर्णिमेला होत असतात. त्यानुसार गेल्या डिसेंबरमध्ये देवीची एक यात्रा झाली. त्या रणपोर्णिमा यात्रेला जास्तीत जास्त भाविक महाराष्ट्रातील असतात. आता सध्या चुडीपोर्णिमा अर्थात शाकंभरी पोर्णिमा यात्रा होत आहे. या यात्रेसाठी सुमारे 6 लाख भाविक आले असून एकूण जवळपास 8 ते 10 लाख भाविक हजेरी लावतील असा अंदाज आहे. यात्रेनिमित्त आज पहाटे 4 ते सकाळी 6:30 वाजेपर्यंत श्री रेणुका देवीचा अभिषेक, पूजा, आरती आदी धार्मिक कार्यक्रम पार पडले. आता सायंकाळी 4 ते 6:30 वाजेपर्यंत पुन्हा पूजा, आरती वगैरे विधी होणार असून त्यानंतर पालखी प्रदक्षिणा होणार आहे.
अभिषेक पूजा आरती वगैरे धार्मिक विधीच्या काळात देवीचे मंदिर भाविकांसाठी बंद ठेवले जात असल्यामुळे आज सकाळी देवीच्या दर्शनासाठी मंदिराबाहेर भाविकांची मोठी रांग लागल्याचे पहावयास मिळत होते.
शाकंभरी यात्रेनिमित्त डोंगरावर मोठ्या प्रमाणात गर्दी होणार असल्याने भाविकांना पिण्याचे शुद्ध पाणी, निवास आणि स्वच्छतागृहे यांची सुविधा उपलब्ध करून देण्यात आली आहे. यात्रा काळात कोणत्याही प्रकारचा गोंधळ होऊ नये यासाठी मोठ्या प्रमाणात पोलीस बंदोबस्त ठेवण्यात आला आहे. तसेच ठिकठिकाणी सीसीटीव्ही कॅमेरे बसविण्यात आले आहेत. पुढील काही दिवस डोंगरावर गर्दी होणार असल्यामुळे स्वच्छतेचे काम हाती घेण्यासाठी अधिक कर्मचारी नियुक्त करण्यात आले आहेत.
दरम्यान, डोंगरावर दाखल भाविकांना वाहतूक कोंडीचा सामना करावा लागत आहे. त्यामुळे अनेकांना बराच वेळ एकाच ठिकाणी थांबून राहावे लागत आहे. याची दखल घेऊन डोंगरावरील वाहतूक व्यवस्था सुरळीत करण्याची मागणी होत आहे.
