बेळगाव लाईव्ह : बेळगाव शहरातील बसवान गल्ली येथील एका अपार्टमेंटमध्ये गॅस सिलेंडरला गळती लागून उडालेल्या आगीच्या भडक्यात होरपळून गंभीर जखमी झालेल्या दोघा जणांचा मृत्यू झाला असून अन्य तिघेजण जखमी झाल्याची घटना काल दुपारी घडली.
मूळचे उडपीचे असलेल्या कमलाक्षी भट (वय 80) आणि हेमंत भट (वय 27) अशी आगीच्या दुर्घटनेत मृत्युमुखी पडलेल्यांची नावे आहेत. त्याचप्रमाणे जखमी झालेल्यांमध्ये गोपाळ कृष्ण भट (वय 84), ललिता भट (वय 48) व मोहन भट (वय 56) यांचा समावेश आहे.
जखमींपैकी दोघाजणांची प्रकृती चिंताजनक असून त्यांच्यावर उपचार सुरू आहेत. बसवान गल्ली येथील अपार्टमेंटच्या तिसऱ्या मजल्यावर ही दुर्घटना घडली.
मिळालेल्या माहितीनुसार रिकामा सिलेंडर बदलून नव्या सिलेंडरला रेग्युलेटर बसवताना ते नीट बसले नाही. त्यामुळे गॅस गळती होऊन जवळच असलेल्या दिव्यामुळे भडका उडाला. त्यामध्ये 5 जण होरपळून जखमी झाले होते. त्यापैकी गंभीर जखमी झालेल्या कमलाक्षी भट व हेमंत भट यांचा उपचाराचा फायदा न होता मृत्यू झाला.
आगीच्या या दुर्घटनेत घरातील कपड्यांसह गृहपयोगी वस्तू जळून खाक झाल्या असून आग आटोक्यात आणण्यासाठी अग्निशमन दलाला पाचारण करण्यात आले होते. सदर दुर्घटनेची खडेबाजार पोलीस ठाण्यात नोंद झाली आहे.