बेळगाव लाईव्ह :वॉटर स्पोर्ट्ससह पर्यटकांना आकर्षित करणाऱ्या नव्या गोष्टी सुरू होण्याद्वारे परिवर्तन घडत असलेल्या किल्ला तलावाला आज शनिवारी सकाळी लघु पाटबंधारे मंत्री एन. एस. बोसराजू यांनी भेट देऊन पाहणी केली.
सदर भेटीप्रसंगी मंत्री बोसराजू यांच्या समवेत बेळगाव उत्तरचे आमदार असिफ (राजू) सेठ आणि संबंधित अधिकारी वर्ग उपस्थित होता. यावेळी मंत्र्यांनी आमदार सेठ व अधिकाऱ्यांसमवेत तलावाच्या ठिकाणी सुरू असलेल्या विकास कामांची पाहणी केली.
तसेच भविष्यातील विकास प्रकल्पांबद्दल चर्चा केली. बेळगावचा ऐतिहासिक वारसा असलेला किल्ला तलाव शहराच्या भूजल पाणीसाठ्याचे जतन आणि देखभाल करण्यात महत्त्वाची भूमिका बजावतो.
या तलावाचा विकास आणि या ठिकाणी लोकांना आनंद लुटण्यासाठी वॉटर स्पोर्ट्स सारख्या सुविधा उपलब्ध करून देणे हे एक मोठे पाऊल असल्याचे, आमदार असिफ सेठ यांनी यावेळी बोलताना सांगितले.
