बेळगाव लाईव्ह :बेळगावचा नवा मास्टर प्लॅन तयार करण्यासाठीच्या कामाचे कंत्राट देण्यासाठी बेळगाव शहर विकास प्राधिकरणाने बुडा निविदा काढली असून त्यासाठी 5 कंपन्यांच्या निविदा दाखल झाल्या आहेत. आता या निविदांच्या तांत्रिक पडताळणीची प्रक्रिया सुरू झाली आहे.
बेळगाव शहर तसेच तालुक्यातील 55 गावांसाठी बेळगावचा नवा मास्टर प्लॅन तयार केला जाणार आहे. या मास्टर प्लॅनच्या कामाचे कंत्राट देण्यासाठी गेल्या 21 ऑक्टोबर रोजी बुडाने 1 कोटी 80 लाख रुपयांची निविदा काढली होती.
नोव्हेंबर महिन्यात ही निविदा प्रक्रिया पूर्ण होणार होती. तथापि बुडाने निविदा प्रक्रियेच्या वेळापत्रकात बदल केल्यामुळे निवेदा दाखल करण्याची अंतिम तारीख 23 ऐवजी 27 नोव्हेंबर करण्यात आली होती. त्याचप्रमाणे बुडाने तांत्रिक निविदा उघडण्याची तारीख 24 ऐवजी 28 नोव्हेंबर केली आणि त्यानुसार निविदा उघडण्यात आल्या.
त्यावेळी 5 कंपन्यांच्या निविदा दाखल झाल्याचे निदर्शनास आले आहे. सरकारच्या विधिमंडळ अधिवेशनात बुडा अधिकारी व्यस्त असल्यामुळे तांत्रिक पडताळणीचे काम अद्याप पूर्ण झालेले नसून अधिवेशन संपल्यावरच ती प्रक्रिया पूर्ण होणार असल्याचे कळते.
वैध ठरणाऱ्या निविदांपैकी सर्वात कमी रकमेची निविदा बुडाकडून मंजूर केली जाईल आणि संबंधित कंपनीला मास्टर प्लॅन तयार करण्याच्या कामाचे कंत्राट मिळेल. या डिसेंबर महिन्यातच कंत्राटदार निश्चित होईल अशी माहिती पुढाकार्यालयातून मिळाली आहे.
बेळगावच्या सध्याच्या मास्टर प्लॅनमध्ये बेळगाव शहरासह 27 गावांचा समावेश आहे. मात्र बुडा कार्यक्षेत्रात बेळगाव तालुक्यातील आणखी 28 गावांचा नव्याने समावेश करण्यात आल्यामुळे बुडा कार्यक्षेत्रातील गावांची संख्या बेळगावसह 55 झाली आहे. दरम्यान, सध्याचा मास्टर प्लॅन 2014 साली मंजूर झालेला आहे.
या मास्टर प्लॅनची मुदत 31 मार्च 2021 रोजी संपली आहे. तथापि मास्टर प्लॅन तयार नसल्यामुळे जुना मास्टर प्लॅन अद्यापही अंमलात आहे. नवा मास्टर प्लॅन तयार करण्याचे काम 2020 मध्ये सुरू झाले होते ईजीआयएस कंपनीला या कामाचे कंत्राट मिळाले होते.
मात्र राज्य शासनाकडून कंपनीचे कंत्राट रद्द करण्यात आले. त्यावेळी मास्टर प्लॅन तयार करण्याची जबाबदारी कंत्रासदाराकडे देण्यात आली होती.
