Wednesday, April 17, 2024

/

म्हणून… पोलीस आयुक्तांनी दिले रिक्षा चालकांना बक्षीस

 belgaum

बेळगाव लाईव्ह :बेळगावात चोरी करणाऱ्या इराणी टोळीला पकडण्यात पोलिसांना माहीती देऊन मदत करणाऱ्या दोन रिक्षा चालकांना बेळगाव पोलीस आयुक्त सिद्धरामाप्पा यांनी रोख बक्षीस देऊन सन्मानित केले आहे.

बेळगाव खडे बाजार पोलीस स्थानकातील गुन्ह्यात इराणी चोरांच्या हालचालींची माहिती देणाऱ्या रिक्षा चालक दीपक चव्हाण आणि बशीर किल्लेदार यांना 6 हजार रुपये रोख बक्षीस देऊन सत्कार केला. यावेळी डी सी पी स्नेहा देखील उपस्थित होत्या.

दोन दिवसांपूर्वी बेळगाव शहरातील एका सुकामेव्याच्या दुकानांमध्ये खरेदीच्या बहाण्याने येऊन गल्ल्यातील 50 हजार रुपयांचे बंडल लंपास केल्या प्रकरणी खडेबाजार पोलिसांनी दोन महिलांसह एकुण चार इराणी नागरिकांना गजाआड केले होते या प्रकरणी दोन्ही रिक्षा चालकांनी पोलिसांना मदत केली होती.

 belgaum

त्या प्रकरणी बहामन अब्दुलहुसेन बिनैझा (वय 36), हबीबी हसन मोघोल (वय 60), शैदा घोलम करीमझादी (वय 20) आणि करीम अहमद दवालू अशी पोलिसांनी अटक केलेल्या आरोपींची नावे आहेत.

इराण येथील हे सर्वजण प्रवासी व्हिसाद्वारे एका महिन्याच्या भारत पर्यटनासाठी आले आहेत. शहरातील देशपांडे गल्ली येथील शगुन ड्रायफ्रूट्स या दुकानात गेल्या शुक्रवारी सायंकाळी 6 वाजण्याच्या सुमारास खरेदीसाठी ऑटो रिक्षातून आलेल्या तिघा अज्ञातांनी दुकानाच्या गल्ल्यातील 50 हजार रुपयांचे बंडल पळविले होते.Auto drivers

याप्रकरणी खडेबाजार पोलीस ठाण्यात गुन्हा नोंद झाल्यानंतर खडेबाजार उपविभागाचे एसीपी अरुणकुमार कोळूर यांच्या मार्गदर्शनाखाली पोलीस निरीक्षक दिलीप निंबाळकर यांनी आपल्या सहकाऱ्यांच्या मदतीने वेगाने तपासाची चक्रे फिरवून केवळ दोन दिवसात उपरोक्त इराणी चौकडीच्या मुसक्या आवळल्या होत्या.

सुकामेव्याच्या दुकानातील सीसीटीव्ही फुटेज आणि सत्कार केलेल्या दोन्ही ऑटो रिक्षा चालकानी दिलेल्या माहितीवरून ही कारवाई करण्यात आली होती. ताब्यात घेतलेल्या आरोपींकडून चोरलेली रोख रक्कम, टोयोटा कोरोला कार आणि सात मोबाईल असा एकूण 14 लाख रुपये किंमतीचा मुद्देमाल पोलिसांनी जप्त केला होता.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.