बेळगाव लाईव्ह :जे.एन. मेडिकल कॉलेज समोरील दुपदरी स्मार्ट सिटी रस्त्याशेजारील भूमिगत जलवाहिनीला केपीटीसीएल कॉर्नर येथे मोठ्या प्रमाणात गळती लागून रोज हजारो लिटर पाणी वाया जात आहे. याकडे एल अँड टी कंपनीचे साफ दुर्लक्ष होत असल्याबद्दल तीव्र नाराजी व्यक्त होत असून सदर गळती त्वरित दुरुस्त करण्याची मागणी केली जात आहे.
शहरातील जेएनएमसी महाविद्यालयासमोरील काकडीच्या दिशेने जाणाऱ्या स्मार्ट सिटीच्या दोन पदरी मार्ग शेजारी जमिनीखाली असलेल्या जलवाहिनीला गेल्या वर्षभरापासून गळती लागली आहे. त्यामुळे पाण्याची अगणित प्रमाणात नासाडी होत आहे.
सध्या या गळतीमुळे रस्त्याशेजारील पेव्हर्समधून एखाद्या झऱ्याप्रमाणे पाणी रस्त्यावरून वाहत आहे. या पद्धतीने दररोज हजारो लिटर पाणी वाया जात असूनही त्याकडे दुर्लक्ष केले जात आहे. यासंदर्भात वारंवार तक्रार केल्यानंतर गेल्या महिन्यात एल अँड टी कंपनीकडून ही गळती दुरुस्त करण्यात आली होती. मात्र तब्बल पाच दिवस चाललेली ही दुरुस्ती देखील धड करण्यात न आल्यामुळे सदर जलवाहिनीची गळती पुन्हा सुरू झाली असून रस्त्याशेजारील पेव्हर्स त्यामुळे पाण्यात बुडाले आहेत. याखेरीज पेव्हर्स खराब होऊन मोठ्या प्रमाणात पाणी रस्त्यावर वाहून वाया जाण्याबरोबरच केपीटीसीएल कॉर्नरवर साचणारे पाणी ये-जा करणाऱ्या वाहन चालकांसाठी विशेष करून दुचाकी वाहन चालकांसाठी धोकादायक ठरत आहे.
सदर गळतीमुळे पुन्हा रोज हजारो लिटर पाण्याचा अपव्यय होत असल्यामुळे नागरिकात तीव्र नाराजी व्यक्त होत आहे. तसेच एल अँड टी कंपनीच्या वरिष्ठ अधिकाऱ्यांनी याकडे गांभीर्याने लक्ष देऊन यापूर्वी सदर जलवाहिनीची निष्काळजीपणे दुरुस्ती करणाऱ्या अभियंता व कर्मचाऱ्यांवर कारवाई करावी.
याखेरीज सध्या लागलेली गळती कायमची बंद होण्यासाठी जलवाहिनीची चांगल्या प्रकारे दुरुस्ती करण्याचे आदेश द्यावेत, अशी जोरदार मागणी केली जात आहे.
