बेळगाव लाईव्ह : चित्रदुर्ग तालुक्यातील मल्लापूरजवळ सोमवारी सकाळी झालेल्या अपघातात चार जणांचा मृत्यू झाला तर तीन जण गंभीर जखमी झाल्याची घटना घडली आहे. मृत आणि जखमी बेळगावातील वडगाव निझामिया मोहल्ला परिसरातील आहेत.
मिळालेल्या माहितनुसार चित्रदुर्ग जिल्ह्यात सोमवारी पहाटेच्या सुमारास राष्ट्रीय महामार्गावर होस्पेटहुन तुमकूरला जात असताना उभ्या असलेल्या ट्रकला भरधाव कार आदळल्याने भीषण दुर्घटना घडली. या अपघातात कारचा चक्काचूर झाला असून चौघांचा जागीच मृत्यू झाला आहे. या घटनेत तीन जण गंभीर जखमी झाले असून त्यांना रुग्णालयात दाखल करण्यात आले आहे.
वृत्त समजताच चित्रदुर्ग ग्रामीण पोलिसांनी घटनास्थळी धाव घेऊन तपास केला. या अपघाताबाबत चित्रदुर्ग ग्रामीण पोलिस ठाण्यात गुन्हा दाखल करण्यात आला आहे. होस्पेट बाजूने तुमकूरला जात असताना हा अपघात झाला.
शमशुद्दीन शेख (40), मल्लिका शरीफ (37), खलीदा शरीफ(42) आणि तबरेज (13) अशी मृतांची नावे आहेत. चित्र दुर्ग पोलीस अधीक्षक धर्मेंद्र कुमार मीना यांनी दिलेल्या माहितनुसार गंभीर जखमी माहे जबिन, रेहान आणि रेहमान यांना जिल्हा रुग्णालयात दाखल करण्यात आले आहे.दरम्यान, या अपघातातील सर्व मृत जखमी बेळगावातील वडगाव निझामिया मोहल्ला येथील रहिवासी आहेत.
अपघाताचे वृत्त समजताच वडगांव येथील निझामिया मोहल्ला परिसरावर शोककळा पसरली असून याबाबत हळहळ व्यक्त करण्यात येत आहे. मृतदेह बेळगावला आणले जात आहेत. वडगाव येथील समशोद्दिन शेख हे आपल्या बहिणीच्या कुटुंबीयांना तुमकुरू येथे सोडायला गेले होते चित्रदुर्ग जवळ हा अपघात घडला आहे.