बेळगाव लाईव्ह :काकती येथील मार्कंडेय सहकारी साखर कारखान्याच्या 2022-23 सालची सर्वसाधारण सभा सोमवारी (दि. 25) सकाळी 11 वाजता कारखाना स्थळावर होणार आहे. या सभेत विविध विषयांवर चर्चा होणार आहे.
मार्कंडेय कारखान्यासाठी गेल्या महिन्यांत संचालक मंडळाची निवडणूक झाली. 11 सप्टेंबर रोजी अध्यक्ष, उपाध्यक्षांची बिनविरोध निवड झाली. पण, जुन्या संचालक मंडळाचा कार्यकाळ 27 सप्टेंबरपर्यंत आहे.
त्यामुळे जुन्या मंडळाची ही शेवटची सभा असणार आहे. या सभेत दहा विषयांवर चर्चा होणार आहे. त्यामध्ये प्रामुख्याने संचालक मंडळाने संमत केलेला सन 2022-23 सालचा वार्षिक सर्वसाधारण अहवाल मंजूर करणे. पी. जी. घाळी सन्सने केलेल्या कारखान्याच्या लेखापरिशोधन अहवालाला अनुमोदन देणे. कारखान्याच्या 2023-24 सालासाठी नियोजित कार्यक्रमांना अनुमोदन देणे.
अंंदाज पत्रक, जमा-खर्च पत्रकाला मंजुरी देणे. अंदाजे खर्चापेक्षा अधिक झालेल्या खर्चाला मंजुरी देणे. लेखापरिशोधन अहवालातील त्रूटी दूर करणे, दुरूस्ती अहवालाला मंजुरी देणे. कर्नाटक सहकार संघ दुरूस्ती कायदा कलम 20 नुसार कारखान्याच्या उपनियम क्रमांक 7 च्या अ वर्ग ऊस उत्पादक सदस्य, ब वर्ग सहकार संघाच्या संस्था आणि ड वर्ग ऊस उत्पादक शेअर रक्कम दुरूस्ती करणे, 2023-24 सालासाठी सरकारमान्य लेखापरिक्षकांच्या नियुक्ती करणे आदी विषयांवर चर्चा होणार आहे.
सभासदांनी कारखान्याचे ओळखपत्र किंवा शेअर सर्टिफिकेट घेऊन उपस्थित राहावे. वार्षिक सर्वसाधारण सभेत कारखान्याशी संबंधित कोणत्याही विषयावरील माहिती सभेच्या 3 दिवस आधी व्यवस्थापकीय संचालक यांच्या नावे लेखी मागणी करावी, अशा सूचना व्यवस्थापकीय संचालक एस. एस. पुजारी यांनी केल्या आहेत.
