मुडलगी (जि. बेळगाव) तालुक्यातील वडेरहट्टी गावामध्ये एका युवकाचा तीक्ष्ण हत्याराने खून करण्यात आल्याची घटना आज सोमवारी सकाळी उघडकीस आल्यामुळे गावात एकच खळबळ उडाली आहे.
शंकर सिद्धाप्पा जगमोती (वय 30, रा. वडेरहट्टी) असे खून झालेल्या युवकाचे नांव आहे. खुनाची माहिती मिळताच स्थानिक पोलिसांनी घटनास्थळी धाव घेऊन पंचनामा केला.
तसेच मृतदेह उत्तरीय तपासणीसाठी सरकारी हॉस्पिटलकडे पाठवला. सदर खून प्रकरणी पोलिसांनी मयत युवकाच्या कुटुंबीयांकडे चौकशी करण्याबरोबरच मारेकऱ्यांची शोध मोहीम हाती घेतली आहे.
शंकर यांच्या खुनाचे निश्चित कारण अद्याप समजू शकलेले नाही.गेल्या आठवड्यात बेळगाव तालुक्यातील पिरनवाडीत युवकाचा खून झाला होता त्या अगोदर चिकोडी येथे जैन मुनींच्या खून प्रकरणाची तर देशभरात चर्चा झाली होती त्यामुळे बेळगाव शहर आणि जिल्ह्यात खुनाचे प्रमाण वाढले आहे.
