फुकट्या प्रवाशांविरुद्ध मोहीम उघडताना वायव्य कर्नाटक परिवहन महामंडळाच्या तपासणी पथकांनी गेल्या जानेवारी ते जून या कालावधीत विना तिकीट फुकट बस प्रवास करू पाहणाऱ्या 21,034 प्रवाशांकडून एकूण 20 लाख 19 हजार रुपयांचा दंड वसूल केला आहे.
कर्नाटक वायव्य परिवहन महामंडळाच्या हुबळी येथील मुख्य कार्यालयामध्ये झालेल्या अधिकाऱ्यांच्या आढावा बैठकीत ही माहिती देण्यात आली.
बैठकीच्या अध्यक्षस्थानी महामंडळाचे व्यवस्थापकीय संचालक राजेश हुद्दार हे होते. जनतेला उत्तम वाहतूक सुविधा उपलब्ध करून देणे. तसेच बस चालकांना शिस्त लावणे यात निरीक्षकांची भूमिका महत्त्वाची असते. परिवहनच्या महसुलाची गळती रोखण्यासाठी निरीक्षकांनी आपले कर्तव्य अधिक जबाबदारीने पार पाडावे, अशी सूचना हुद्दार यांनी बैठकीत केली.
उपमुख्य वाहतूक अधिकारी एच. रमणगौडा यांनी शक्ती योजनेमुळे महिला प्रवाशांच्या संख्येत लक्षणीय वाढ झाल्याचे सांगून बस चालक आणि वाहकाने प्रत्येक थांब्यावर बस थांबवावी. तसेच प्रवाशांशी सौजन्याने वागावे असे सांगितले.
यावेळी उत्कृष्ट कामगिरी बजावणारे तपास अधिकारी आणि बस चालकांचा रोख पारितोषिक व प्रशस्तीपत्र देऊन सत्कार करण्यात आला. बैठकीस वायव्य परिवहन मंडळाच्या सर्व विभागाचे वरिष्ठ अधिकारी उपस्थित होते.
