बेळगाव महापालिकेकडून भू-भाडे वसुली कंत्राटासंदर्भात काल सोमवारी राबविण्यात आलेल्या ई -लिलाव प्रक्रियेमध्ये 1.12 कोटी रुपये इतकी आजवरची सर्वोच्च बोली लावण्यात आली. कंत्राटदार शिवानंद होरट्टी यांनी ही 1,12,40,000 रुपयांची बोली लावल्यामुळे आता भू -भाडे वसुलीचा ठेका त्यांनाच मिळणार हे निश्चित झाले आहे.
बेळगाव शहरातील रस्त्यावरील विक्रेते, फेरीवाले आणि खाद्यपदार्थ विक्रेते यांच्याकडून भू-भाडे वसूल केले जाते. कांही वर्षांपूर्वी महापालिकेचे कर्मचारी भू-भाडे वसुली करत होते. मात्र त्यामुळे महापालिकेला अपेक्षित उत्पन्न मिळत नव्हते. त्यामुळे 2019 मध्ये महापालिकेने भू-भाडे वसुलीचे कंत्राट देण्याचा निर्णय घेतला.
तेंव्हापासून कंत्राटदारांकडून भू-भाडे वसुली केली जाते. भूपाड्याचे दर महापालिकेने आधीच निश्चित केले आहेत. कितीही विक्रमी बोली लागली तरी कंत्राटदाराला पालिकेने निश्चित केलेल्या दरानुसारच भू -भाडे वसूल करावे लागते.
भू-भाडे वसुली कंत्राटासाठी काल सोमवारी महापालिकेने राबविलेल्या प्रक्रियेमध्ये 9 जणांनी भाग घेतला होता त्यामुळे मोठी चुरस होती लिलाव प्रक्रियेसाठी 50 लाख रुपये मूळ बोली निश्चित करण्यात आले होती. मात्र प्रत्यक्षात मूळ बोलीच्या दुपटीपेक्षा अधिक बोली लागली. कंत्राटदार शिवानंद होरट्टी यांनी ही तब्बल 1 कोटी 12 लाख 40 हजार रुपयांची बोली लावली.
मागील वेळी म्हणजे 2021 मध्ये झालेल्या लिलावात 50 लाख रुपये बोली लागली होती. यंदा दुपटीपेक्षा जास्त बोली लागल्याने महापालिकेचा फायदा झाला आहे. भू-भाडे वसुलीच्या लिलावातील आजवरची ही सर्वोच्च बोली असल्याची माहिती महापालिकेच्या महसूल विभागाकडून मिळाली आहे.