काँग्रेस सरकारच्या पाच महत्त्वाकांक्षी गॅरंटी योजनांपैकी महिलांसाठीच्या मोफत बस प्रवास योजनेला व्यापक प्रतिसाद मिळत असून विशेष करून बेळगावसह राज्यातील विविध धार्मिक स्थळांच्या ठिकाणी महिलांच्या गर्दीत लक्षणीय वाढ झाली आहे.
राज्यातील काँग्रेस सरकारने महिलांसाठीची मोफत बस प्रवासी योजना अमलात आणल्यानंतर बेळगाव जिल्ह्यातील श्री यल्लमा देवस्थान, चिंचली -मायाक्का मंदिरासह राज्यातील शिर्शी, गोकर्ण, मुर्डेश्वर, कुडल संगम आदी महत्त्वाच्या धार्मिक स्थळी भाविकांची गर्दी कमालीची वाढली आहे.
विशेष करून विविध धार्मिक स्थळांवर शनिवार आणि रविवार या वीकेंडच्या दिवशी महिला भाविकांच्या संख्येत लक्षणीय वाढ झाल्याचे पहावयास मिळत आहे. ऑटो रिक्षा व खाजगी प्रवासी वाहनातून प्रवास करणाऱ्या महिलांकडून आता बस प्रवासाला प्राधान्य दिले जात आहे. धार्मिक वृत्तीचा महिलावर्ग सरकारच्या मोफत बस प्रवास योजनेचा पुरेपूर लाभ उठवताना दिसत आहे.
मोफत बस प्रवासाची योजना सुरू झाल्यापासून म्हणजे गेल्या 11 जून पासून ते 25 जून पर्यंत राज्यातील तब्बल 7 कोटीहून अधिक महिलांनी या योजनेचा लाभ घेतला आहे यापैकी बहुतेक महिला या नोकरी कामानिमित्त परगावी जाणाऱ्या आहेत.
शनिवार आणि रविवारी प्रवास केलेल्या महिलांपैकी बहुतेक महिला या पर्यटन स्थळ, धार्मिक स्थळी भेट देणाऱ्या आहेत अशी माहिती परिवहन मंडळ सूत्रांनी दिली आहे.
