बेळगाव लाईव्ह : महाराष्ट्र एकीकरण समितीच्या उमेदवारांसंदर्भात उत्कंठा शिगेला पोहोचली असून दक्षिण विधानसभा मतदार संघानंतर आता उत्तर विधानसभा मतदार संघातूनही जनमत घेण्यात आले आहे. दक्षिणमधून रमाकांत कोंडुसकर यांना वाढता पाठिंबा असून उत्तर मतदार संघातून समितीच्या बाजूने जनमत वाढत चालले आहे.
मागील विधानसभेत महाराष्ट्र एकीकरण समितीेला उत्तर मतदार संघात म्हणावा तितका प्रतिसाद मिळाला नव्हता मात्र आता या निवडणुकीत चक्क फलकावर समितीचे उमेदवारांची नावे झळकू लागली आहेत.
उत्तर मतदार संघातून चौकाचौकातील फलकावर शिवाजी मंडोळकर यांच्या नावाला जाहीर पाठिंबा दर्शविण्यात आला आहे तर अमर येळळूरकर यांना देखील घराघरात पसंदी मिळत आहे त्यामुळे उत्तरमधील जनमत पूर्ण झाले आहे.
निवड कमिटीच्यावतीने इच्छुक उमेदवारांच्या मुलाखती घेण्यात आल्या असून गुरुवारी सायंकाळी किंवा शुक्रवारी अंतिम उमेदवार जाहीर करण्याची शक्यता आहे.
उत्तर मतदार संघात ऍड. अमर येळ्ळूरकर आणि शिवाजी मंडोळकर या दोघांनी उमेदवारीसाठी अर्ज भरले असून आज ‘दक्षिण’प्रमाणे ‘उत्तर’मध्ये देखील पाठिंबा जाहीर करण्याचे सत्र सुरु आहे. उत्तर मध्ये दोघात कुणाला उमेदवारी मिळणार याकडेही सर्वांचे लक्ष लागून राहिले आहे.
