कर्नाटक व्याप्त सीमाभागातील 865 गावांमधील मराठी भाषिकांना महाराष्ट्राच्या शिंदे फडणवीस सरकारने दिलासा दिला आहे. या गावातील मराठी कुटुंबातील लाभार्थींना महात्मा ज्योतिराव फुले जन आरोग्य योजना लागू करण्यास महाराष्ट्र सरकारने मंजुरी दिली आहे. या निर्णयामुळे मूत्रपिंड प्रत्यारोपणा बरोबरच तब्बल 996 उपचारांचा लाभ सीमावासीय मराठी बांधवांना मिळणार आहे.
महाराष्ट्र -कर्नाटक सीमाभागातील 865 गावांमधील मराठी भाषिकांना महाराष्ट्रातील नागरिक म्हणून तेथील नागरिकांसाठी असलेल्या कल्याणकारी योजना लागू होणार आहेत. त्या संदर्भात मुख्यमंत्री एकनाथ शिंदे यांनी अधिवेशनादरम्यान घोषणा केली होती.
सीमाभागातील महाराष्ट्र सरकारने दावा सांगितलेल्या बेळगाव, कारवार, गुलबर्गा व बिदर जिल्ह्यातील बारा तहसील मधील 865 गावात असलेल्या अंत्योदय अन्न योजना प्राधान्य गटातील कुटुंबे आणि अन्नपूर्णा शिधापत्रधारक कुटुंबांचा समावेश महात्मा ज्योतिराव फुले जन आरोग्य योजनेच्या लाभार्थींमध्ये करण्यास मान्यता देण्यात आली आहे.
सदर योजनेत कांही बदल झाल्यास संबंधित गावातील लाभार्थी कुटुंबानाही तो लागू होणार आहे. या संदर्भात महाराष्ट्र राज्य सरकारने काल सोमवारी शासकीय निर्णय जाहीर केला आहे.
