Wednesday, April 17, 2024

/

निपाणीतून काकासाहेब पाटील यांना सहाव्यांदा उमेदवारी

 belgaum

बेळगाव लाईव्ह : विधानसभा निवडणुकीसाठी काँग्रेस पक्षाने मार्च महिन्यातच १२४ जागांसाठी उमेदवारी यादी जाहीर केली असून उर्वरित १०० जागांपैकी ४२ जागांसाठी उमेदवार यादी जाहीर केली आहे. यामध्ये निपाणी मतदार संघात माजी आमदार काकासाहेब पाटील यांना सलग सहाव्यांदा उमेदवारी जाहीर करत काँग्रेसने त्यांच्यावर सार्थ विश्वास दाखवला आहे.

पक्षाचे निवडणूक प्रभारी मुकुल वासनिक यांनी आज दुसरी यादी जाहीर केली असून अद्याप बेळगाव जिल्हा मतदार संघातील पाच मतदार संघांचे उमेदवार जाहीर करणे बाकी आहे.

बेळगाव जिल्ह्यातील उमेदवारांची निवड पाहता काँग्रेस नेत्यांना हायकमांडने आश्चर्याचा धक्का दिला आहे. धारवाडमधून माजी मंत्री विनय कुलकर्णी, निपाणीतून माजी आमदार काकासाहेब पाटील, गोकाकमधून भाजपचे राज्यसभा सदस्य खा. इरण्णा कडाडी यांचे दूरचे नातेवाईक डॉ. महांतेश कडाडी यांना उमेदवारी जाहीर केली आहे तर अद्याप बेळगाव उत्तर, बेळगाव दक्षिण, अरभावी, अथणी, रायबाग मतदारसंघासाठी सावध खेळी खेळत या मतदार संघातील उमेदवारांची यादी अद्याप गुलदस्त्यात ठेवण्यात आली आहे.

 belgaum

माजी आमदार काकासाहेब पाटील यांनी १९९९ ते २०१३ या सालात हॅट्ट्रिक साधत प्रचंड मताधिक्याने विजय मिळविला होता. मात्र २०१३ सालापासून सलग दोनवेळा पराभव पत्करूनदेखील हायकमांडने त्यांच्यावर विश्वास दाखवत त्यांच्या उमेदवारीवर शिक्कामोर्तब केले आहे. निपाणीमधून महाराष्ट्र एकीकरण समिती आणि आम आदमी पक्षाचे उमेदवार देखील निवडणूक लढविणार असून भाजपने मात्र शशिकला जोल्ले यांनाच उमेदवारी देण्याचे निश्चित केले आहे. यामुळे आता समिती आणि आमआदमी पक्षाच्या निर्णयाकडे सर्वांचे लक्ष लागून राहिले आहे.

काँग्रेसने गोकाक मतदार संघात पंचमसाली लिंगायत समाजातील उमेदवाराला प्राधान्य देत रमेश जारकीहोळी यांच्यासमोर राजकारणाचा नवा पत्ता टाकला आहे. सध्या राज्यभरात लिंगायत समाज एकवटला असून लिंगायत समाजाला जो राष्ट्रीय पक्ष प्राधान्य देईल, त्याच पक्षाला पाठिंबा देण्याचा निर्धार या समाजाने केला आहे. यामुळे गोकाक मतदार संघात रमेश जारकीहोळी यांच्यापुढे मोठे आव्हान उभे ठाकले आहे. बेळगावमधील पाच विधानसभा मतदार संघ तसेच इतर काही मतदार संघात बंडखोरीची शक्यता असल्याने अद्याप या जागांवर उमेदवार निश्चित करण्यात आले नाहीत.

विधानसभा मतदारसंघानुसार हे उमेदवार पुढीलप्रमाणे आहेत. निपाणी : काकासाहेब पाटील, गोकाक : महांतेश कडाडी, कित्तूर : बाबासाहेब डी. पाटील, सौंदत्ती यल्लमा : विश्वास वसंत वैद्य, मुधोळ एससी : रामाप्पा बाळाप्पा तिम्मापूर, बेळगी : जे. टी. पाटील, बदामी : भीमसेन बी. चिम्मणकट्टी, बागलकोट : हुलप्पा वाय. मिटी, बिजापूर शहर : अब्दुल हमीद काजासाहेब मुश्रीफ, नागठाण एससी : विठ्ठल कटकधोंड, अफजलपुर : एम वाय पाटील, यादगीर : चेन्नरेड्डी पाटील तुन्नूर, गुरमीटकल : बाबुराव चिंचसुर, गुलबर्गा दक्षिण : अल्लमप्रभू पाटील, बसवकल्याण : विजय धरम सिंग, गंगावती : इक्बाल अन्सारी, नरगुंद : बी. आर. यावगळ, धारवाड : विनय कुलकर्णी, कलघटगी : संतोष एस. लाड, शिर्शी : भीमान्ना नाईक, येल्लापूर : व्ही. एस. पाटील, कुडलीगी एसटी : डॉ. श्रीनिवास एन. टी., मोलकलमूर एसटी : एन. वाय. गोपाळकृष्ण, चित्रदुर्ग : के. सी. वीरेंद्र, होलाळकेरी एससी अंजनी एच., चेन्नगीरी : बसवराजू शिवगंगा.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.