विद्यार्थी किंवा मुलांना निवडणुकीच्या प्रचारात सहभागी करून घेण्यावर निर्बंध घालण्यात आले आहेत निवडणूक आयोगातर्फे राज्य सरकारचे अधीन सचिव संजय बी. एस. यांनी तसा आदेश बजावला आहे.
कर्नाटक विधानसभा निवडणुकीनिमित्त राजकीय पक्षांकडून प्रचार सुरू झाला आहे. यासाठी सभा कार्यक्रमांचे आयोजन केले जात आहे. त्यासाठी नियमावली व अटी जारी करण्यात आल्या असून त्यात आता शालेय विद्यार्थी किंवा मुलांना सहभागी करून घेण्याचे निर्देश निवडणूक आयोगाकडून जारी झाले आहेत. यामुळे सर्व पक्षांकडून याचे पालन होण्याची गरज आहे. उमेदवारांना याची खबरदारी घ्यावी लागणार आहे.
विद्यार्थी किंवा मुलांना निवडणुकीच्या प्रचारात सहभागी करून घेऊ नये यासंबंधीचा आदेश निवडणूक आयोगातर्फे राज्य सरकारचे अधिन सचिव संजय बी. एस. यांनी बजाविला आहे. या आदेशाची प्रत जिल्हा निवडणूक अधिकारी, निवासी जिल्हाधिकाऱ्यांसह तालुकास्तरीय अधिकाऱ्यांना पोहच झाली आहे.
राजकीय पक्षांनी कोणत्याही कारणांनी निवडणूक प्रचारासाठी मुलांना सहभागी करून घेऊ नये. निवडणूक प्रचारादरम्यान त्याची वेळोवेळी शहानिशा केली जावी अशी सूचना करण्यात आली आहे.
सदर आदेशाचे उल्लंघन केल्यास संबंधित उमेदवार, कार्यकर्ते यांच्यावर कडक कारवाई करण्यात येईल असा इशाराही देण्यात आला आहे.
