बेळगाव लाईव्ह : परिवहन कर्मचाऱ्यांच्या वेतनात १५ टक्के वाढ करण्याचे आदेश राज्य सरकारने दिले असले तरी कर्मचारी संघटनेचे अध्यक्ष आर. चंद्रशेखर यांनी २४ मार्चपासून पासून संपावर जाणार असल्याचे जाहीर केले होते. परंतु, उच्च न्यायालयाने परिवहन कर्मचाऱ्यांच्या संपाला स्थगिती दिली आहे.
राज्यात परीक्षा सुरू असून संपामुळे परीक्षा देण्यासाठी जाणाऱ्या विद्यार्थ्यांची आणि जनतेची गैरसोय होणार आहे. त्यामुळे न्यायमूर्ती प्रसन्ना बी. वराळे आणि अशोक एस. किनगी यांच्या अध्यक्षतेखालील खंडपीठाने संघटनांना तीन आठवडे संपावर जाऊ नये, असे निर्देश दिले आहेत.
एच. एम. व्यंकटेश यांनी परिवहन कर्मचारी संघटनेच्या समविचारी मंचाने संपाबाबत उच्च न्यायालयात जनहित याचिका दाखल केली होती. या याचिकेवर सुनावणी करत उच्च न्यायालयाने संपाला स्थगिती दिली.
२१ मार्च रोजी परिवहन कर्मचारी आंदोलन करण्याच्या तयारीत होते. यावेळी राज्य सरकारने पगारात १५ टक्के वाढ करण्याचा आदेश काढला होता. त्यामुळे संप मागे घेतला. मात्र, आता पुन्हा समविचारी मंचने परिवहन संपाची हाक दिली आहे.
