विधानसभेतील विरोधी पक्ष नेते आणि माजी मुख्यमंत्री सिद्धरामय्या हे आता एका नव्या वादात गुंतले असून प्रजाध्वनी यात्रेकरिता लोकांना एकत्र करण्यासाठी त्यांना प्रत्येकी 500 रुपये देण्याचा सल्ला आपल्या पक्षनेत्यांना देतानाचा त्यांचा व्हिडिओ व्हायरल झाला आहे.
कर्नाटकातील आगामी विधानसभा निवडणुकीच्या पार्श्वभूमीवर काँग्रेस पक्षाने मतदारांपर्यंत पोहोचण्यासाठी प्रजाध्वनी यात्रेचे आयोजन केले आहे. या यात्रेच्या माध्यमातून माजी मुख्यमंत्री सिद्धरामय्या यांच्यासह सर्व काँग्रेस नेते अलीकडे कांही दिवसांपासून राज्यव्यापी दौऱ्यावर आहेत.
सोशल मीडियावर व्हायरल झालेल्या व्हिडिओमध्ये सिद्धरामय्या कांही पक्ष नेत्यांसमोर (केपीसीसी कार्याध्यक्ष व माजी मंत्री सतीश जारकिहोळी, बेळगाव ग्रामीणच्या आमदार लक्ष्मी हेब्बाळकर आणि आमदार हेब्बाळकर यांचे बंधू विधान परिषद सदस्य चन्नराज हट्टीहोळी) बसले आहेत.
त्यावेळी सिद्धरामय्या समोर बसलेल्या या आपल्या नेत्यांना बुधवारी बेळगाव तालुक्यातील पंत बाळेकुंद्री गावात आयोजित प्रजाध्वनी यात्रेसाठी प्रत्येकी 500 रुपये याप्रमाणे पैसे देऊन लोकांना गोळा करण्याचा सल्ला देताना दिसतात. या व्हिडिओ वरून काँग्रेस आणि भाजप यांच्यातील वादाला तोंड फुटले असून जनतेकडून पाठिंबा मिळत नसल्यामुळे आपल्या यात्रेसाठी काँग्रेस पैसे देऊन भाडोत्री लोकांना जमा करण्याचा प्रयत्न करत असल्याचा आरोप भाजपने केला आहे.
दुसरीकडे काँग्रेस पक्षाने या आरोपाचा इन्कार करत काँग्रेसची प्रतिमा डागाळण्यासाठी हा बनावट मॉर्फड व्हिडिओ तयार करण्यात आला असल्याचे म्हंटले आहे.
