बेळगाव स्मार्ट सिटी योजनेअंतर्गत टिळकवाडी येथील व्हॅक्सिन डेपोच्या निसर्गरम्य परिसरातील नूतनीकरण करण्यात आलेल्या एका हेरिटेज इमारतीचे ज्येष्ठ नागरिक विरंगुळा केंद्रामध्ये रूपांतर केले जाणार आहे. बेळगाव शहरातील हे पहिले शासकीय ज्येष्ठ नागरिक विरंगुळा केंद्र असणार आहे.
बेळगाव स्मार्ट सिटी लिमिटेडने कांही महिन्यांपूर्वी व्हॅक्सिन डेपो परिसरातील एका ब्रिटिशकालीन स्वातंत्र्यपूर्व काळातील इमारतीचे नूतनीकरण केले आहे. नूतनीकरणामुळे संबंधित इमारतीचा चेहरामोहराच बदलून गेला आहे. त्या ठिकाणी शासकीय अतिथिगृह केले जाईल अशी चर्चा होती. मात्र आता त्या इमारतीचा जेष्ठ नागरिक विरंगुळा केंद्र म्हणून वापर केला जाणार आहे या विरंगुळा केंद्रात ज्येष्ठ नागरिकांना विविध वाद्य खेळाचे साहित्य उपलब्ध करून दिले जाणार आहे.
ज्येष्ठ नागरिकांना उपलब्ध करून दिल्या जाणाऱ्या साहित्यामध्ये तबला, हार्मोनियम, ढोलकी, गिटार आदी साहित्याचा समावेश असणार आहे. याव्यतिरिक्त बुद्धिबळ, सारीपाट, बॅडमिंटन आदी क्रीडा साहित्य उपलब्ध करून दिले जाणार आहे.
आवश्यकतेनुसार मनोरंजनाची किंवा विरंगुळासाठीची अन्य साहित्यही उपलब्ध करून दिले जाणार आहेत. सदर ज्येष्ठ नागरिकांसाठीचे हे विरंगुळा केंद्र सकाळी 10 ते सायंकाळी 5 वाजेपर्यंत खुले ठेवण्याचा बेळगाव स्मार्ट सिटी लिमिटेडचा विचार आहे.
संपूर्ण बेळगाव शहरातील ज्येष्ठ नागरिकांना विरंगुळा केंद्राचा वापर करता यावा. ज्येष्ठांसाठी येथे विविध उपक्रमांचे आयोजन करता यावे, या अनुषंगाने हे नियोजन केले जात आहे. बेळगाव शहरातील हे पहिले शासकीय जेष्ठ नागरिक विरंगुळा केंद्र असल्यामुळे त्या दृष्टीने आवश्यक साहित्याची खरेदी केली जाणार आहे.
