आगामी कर्नाटक विधानसभा निवडणुकीच्या पार्श्वभूमीवर अखिल भारतीय काँग्रेस कमिटीने 124 उमेदवारांची पहिली यादी जाहीर केले आहे. या यादीमध्ये बेळगाव जिल्ह्यातील एकूण 18 पैकी 9 मतदारसंघातील उमेदवारांची घोषणा करण्यात आली असून उर्वरित नऊ मतदारसंघाच्या उमेदवारांचा समावेश दुसऱ्या किंवा तिसऱ्या यादीत असू शकतो.
बेळगाव उत्तर, दक्षिण आणि निप्पाणीसह नऊ मतदारसंघातील काँग्रेसच्या अधिकृत उमेदवारांच्या नावाची घोषणा होणे अद्याप बाकी आहे. मात्र इतर मतदारसंघातील उमेदवारांची नावे जाहीर करण्यात आली आहेत. अथणी असो निपाणी असो बेळगाव दक्षिण अथवा उत्तर असो या मतदार संघातील उमेदवारांच्या बाबतीत अद्याप स्पष्टता दर्शविण्यात आलेली नाही.
सध्या साऱ्यांचे लक्ष बेळगाव दक्षिण आणि उत्तर मतदार संघातील काँग्रेसची उमेदवारी कोणाला मिळणार? याकडे लागून राहिले आहे. बेळगाव उत्तर मधून फिरोज सेठ, राजू सेठ अजीम पटवेगार, हाशिम भावीकट्टी, सीदिक अंकलगी, किरण साधून्नावर आदींसह अनेक जण काँग्रेसच्या तिकिटासाठी इच्छुक आहेत. त्याचप्रमाणे दक्षिणमध्ये देखील रमेश गोरल, प्रभावती चावडी, ॲड. प्रभू यतनट्टी, एस एम बेळवटकर माजी आमदार रमेश कुडची आदी बरेच जण इच्छुक आहेत. त्यामुळे या सर्वांचे कोणाला उमेदवारी मिळणार याकडे कार्यकर्त्यांसह नागरिकांचे लक्ष लागून राहिले आहे.
काँग्रेस हाय कमांडने जाहीर केलेली मतदारसंघानुसार बेळगाव जिल्ह्यातील पक्षाच्या अधिकृत उमेदवारांची नावे त्यांच्या पुढील प्रमाणे आहेत.
चिक्कोडी-सदलगा : गणेश हुक्केरी, कागवाड : भरमगौड कागे…., कुडची एससी : महेंद्र के., हुक्केरी : ए. बी. पाटील, यमकनमर्डी एसटी : सतीश लक्ष्मण जारकीहोळी, बेळगाव ग्रामीण : श्रीमती लक्ष्मी हेब्बाळकर, खानापूर : डाॅ. अंजली निंबाळकर, बैलहोंगल : महांतेश कौजलगी रामदुर्ग : अशोक एम. पट्टण.
