बेळगाव लाईव्ह : बेळगाव तालुका महाराष्ट्र एकीकरण समिती आणि शेतकऱ्यांच्या वतीने शुक्रवार दिनांक 24 मार्च रोजी सकाळी 11 वाजता शिवाजीनगर बेळगुंदी येथे भव्य शेतकरी मेळाव्याचे आयोजन करण्यात आले आहे.
सीमा भागातील शेतकऱ्यांवर या ना त्या कारणाने फिरविण्यात येत असलेला वरवंटा, सुपीक शेतजमिनी हडप करून या जमिनीवर रिंग रोड, बायपास, रेल्वे लाई,न सांडपाणी प्रकल्प यासारख्या प्रकल्पांचा घाट घालण्यात आला आहे.
शेकडो एकर सुपीक शेत जमिनीतून रिंग रोडचा प्रस्ताव, बेळगाव-धारवाड रेल्वे लाईन प्रस्ताव, हलगा-मच्छे बायपास तसेच हलगा सांडपाणी प्रकल्प या माध्यमातून शेतकऱ्यांना उद्ध्वस्त करण्याचा डाव सरकारने आखला आहे.
या विरोधात तीव्र निषेध व्यक्त करण्यासाठी शेतकरी मेळाव्याचे आयोजन करण्यात आले आहे. या मेळाव्यास शेतकरी बांधवांनी मोठ्या संख्येने उपस्थित राहावे, असे आवाहन तालुका महाराष्ट्र एकीकरण समितीच्या वतीने करण्यात आले आहे.
शेतकऱ्यांच्या समस्या निवारणार्थ महाराष्ट्र एकीकरण समितीच्या लढ्याला आता महाराष्ट्रातील स्वाभिमानी शेतकरी संघटनेची साथ मिळाली असून उद्या शुक्रवार दि. 24 मार्च रोजी बेळगुंदी येथे होणाऱ्या शेतकरी मेळाव्यात स्वाभिमानी शेतकरी संघटनेचे लढवय्ये नेते माजी खासदार राजू शेट्टी मार्गदर्शन करणार आहेत.
राष्ट्रीय महामार्ग प्राधिकरण आणि जिल्हा प्रशासनाकडून प्रस्तावित रिंग रोड विरोधात महाराष्ट्र एकीकरण समितीने रान उठवले आहे. गेल्या सहा महिन्यात जिल्हाधिकारी कार्यालयावर विराट मोर्चा काढण्याबरोबरच तालुक्यातील विविध ठिकाणी आंदोलनं करण्यात आली आहेत. प्रांताधिकाऱ्यांच्या विरोधात लेखी आक्षेप नोंदविले आहेत. तथापि अद्याप रिंग रोडचा प्रस्ताव रद्द झालेला नाही. त्यामुळे म. ए. समितीने हा लढा हाती घेतला आहे.
माजी खासदार राजू शेट्टी हे स्वाभिमानी शेतकरी संघटनेचे नेते आहेत. जिल्हा पंचायत सदस्य ते खासदार अशी त्यांची राजकीय कारकीर्द आहे. एक व्होट -एक नोट अशा पद्धतीने प्रचार करून ते लोक वर्गणीतून खासदार झाले होते. ऊस दर आंदोलन, दूध दर आंदोलन, कापूस दर आंदोलनासह इतर आंदोलने हाती घेऊन त्यांनी शेतकऱ्यांना न्याय मिळवून दिला आहे. शेतकऱ्यांच्या समस्या विरोधात दिल्लीतील संसदेत आवाज उठवला आहे. त्यामुळे त्यांचे सर्वच राजकीय पक्षातील वरिष्ठांची चांगले संबंध आहेत. आता रिंग रोड विरोधातील आंदोलनाच्या अनुषंगाने ते शेतकऱ्यांना मार्गदर्शन करणार आहेत. सदर रस्त्याच्या विरोधात ते केंद्रीय वाहतूक मंत्री नितीन गडकरी यांच्याशी चर्चा करू शकतात.
रिंग रोड विरोधातील आमच्या आंदोलनाला पाठिंबा देऊन मार्गदर्शन करण्यासाठी माजी खासदार राजू शेट्टी बेळगुंदीला येत आहेत. त्यामुळे बेळगाव तालुक्यासह सीमा भागातील शेतकऱ्यांनी आपल्या जमिनी वाचविण्यासाठी आणि आपली ताकद दाखवण्यासाठी जास्तीत जास्त संख्येने उद्या शुक्रवारी सकाळी 11 वाजता बेळगुंदी येथील मेळाव्याला हजर राहावे, असे आवाहन म. ए. समितीचे कार्याध्यक्ष माजी आमदार मनोहर किणेकर यांनी केले आहे.
