बेळगाव लाईव्ह : राष्ट्रीय महामार्ग प्राधिकरणाने घातलेला रिंगरोडचा घाट उधळून लावण्यासाठी तालुका महाराष्ट्र एकीकरण समितीने कस लावला आहे. विविध ठिकाणी रिंगरोड विरोधार्थ शेतकऱ्यांमधून जागृती करण्यात येत असून तालुका म. ए. समितीच्या नेतृत्वाखालील झाडशहापूर आणि मुतगेतील रास्ता रोको आंदोलन यशस्वी झाल्यानंतर समितीने पुढील आंदोलनाची तयारी सुरु केली आहे.
परंतु, आंदोलन कोणत्या भागात करावे, याबाबतचा निर्णय शेतकरी व कार्यकर्त्यांशी चर्चा करून घेतला जाणार असल्याची माहिती समितीच्या पदाधिकाऱ्यांनी दिली.
सोमवारी रिंगरोड विरोधात मुतगे येथे रास्ता रोको आंदोलन छेडण्यात आले होते. या रास्ता रोकोमध्ये मुतगा, निलजी आदी भागातील शेतकरी मोठ्या संख्येने सहभागी झाले होते. येत्या पंधरा दिवसात रिंगरोडचा प्रस्ताव रद्द न केल्यास महामार्ग रोखण्याचा निर्णय घेण्यात आला होता.
तसेच राष्ट्रीय महामार्ग प्राधिकरणाच्या कार्यालयाला घेराओ घालून अधिकाऱ्यांना बाहेर पडू न देण्याचा इशाराही दिला होता. त्यानुसार आंदोलनाची रुपरेषा ठरविण्यापूर्वी महामार्ग प्राधिकरण रिंगरोडबाबत कोणता निर्णय घेते, याची काही दिवस प्रतीक्षा करण्याचा निर्णय घेण्यात आला आहे.
मात्र, त्यानंतरही निर्णय घेण्यात आला नाही तर शेतकऱ्यांशी चर्चा करुन महामार्ग प्राधिकरणाच्या कार्यालयाला घेराओ घालण्यासह काकतीजवळ रास्ता रोको केला जाणार आहे.याबाबत समितीचे पदाधिकारी व शेतकरी चर्चा करुन निर्णय घेतील, अशी माहिती माजी महापौर शिवाजी सुंठकर यांनी दिली आहे.
