बेळगाव महापालिकेचे उपमहापौरपद इतर मागासवर्गीय जाती -ब गटासाठी आरक्षित करण्यात आले असून सदर जात प्रमाणपत्र संपूर्ण तपासणी व पडताळणी अंती इच्छुक उमेदवारांना अदा केले जावे, अशी विनंती नगरसेविका वैशाली सिद्धार्थ भातकांडे व अन्य कांही नगरसेवकांनी जिल्हाधिकाऱ्यांकडे एका निवेदनाद्वारे केली आहे.
बेळगाव उपमहापौर पदाची निवडणूक येत्या 6 फेब्रुवारी 2023 रोजी होणार आहे आणि सदर पद हे इतर मागासवर्गीय जाती -ब (ओबीसी -बी) गटासाठी राखीव ठेवण्यात आले आहे. त्यामुळे निवडणुकीसाठी इच्छुक उमेदवारांना ओबीसी -बी प्रमाणपत्राची गरज भासणार आहे.
तेंव्हा आमची विनंती आहे की उमेदवाराच्या कागदपत्रांची संपूर्ण तपासणी व पडताळणी करून त्याला ओबीसी -बी प्रमाणपत्र अदा केले जावे.
त्याचप्रमाणे हे प्रमाणपत्र देण्यापूर्वी उमेदवाराकडून आयकर खात्याचे ‘ना हरकत’ प्रमाणपत्र घ्यावे. पुढील वाद, खटले व परिणाम टाळण्यासाठी या सर्व बाबींची अंमलबजावणी करण्याकडे गांभीर्याने लक्ष देण्याची सूचना आपण संबंधित अधिकाऱ्यांना करावी ही विनंती, अशा आशयाचा तपशील जिल्हाधिकाऱ्यांना सादर करण्यात आलेल्या निवेदनामध्ये नमूद आहे. सदर निवेदनावर नगरसेविका वैशाली सिद्धार्थ भातकांडे, पूजा पाटील, नगरसेवक रवी साळुंखे, मतवाले, शिवाजी मंडोळकर,शाहिद पठाण,अफरोज मुल्ला, खुर्शीद मुल्लाआदींच्या स्वाक्षऱ्या आहेत.
उपमहापौर पदासाठी मागास वर्गीय ब महिला हे आरक्षण जाहीर केलं आहे समितीच्या प्रभाग क्रमांक 10 नगरसेविका वैशाली भातकांडे आणि काँग्रेस नगरसेविका ज्योती कडोलकर या दोनच नगरसेविका या आरक्षणात येणार आहेत त्यामुळे दोन्ही पैकी एक महिला उपमहापौर होणार आहे.समितीच्या वैशाली भातकांडे यांनी जातीय प्रमाण पत्रासाठी अर्ज दाखल केला आहे.
