सत्ताधारी आणि विरोधक यांच्यातील टीका टिप्पण्यांचे सत्र हे काही नवीन नाही. अलीकडच्या काळात काँग्रेसकडून घेण्यात आलेल्या विविध आंदोलनांवरून सत्ताधाऱ्यांनी काँग्रेसला लक्ष्य करत अनेक टीकाटिप्पण्या केल्या आहेत.
आज एका खाजगी कार्यक्रमासाठी आलेल्या मुख्यमंत्र्यांनीही काँग्रेसला लक्ष्य करत जोरदार टोलेबाजी केली आहे. सांबरा विमानतळावर आगमन झाल्यानंतर काँग्रेसच्या आंदोलनांवरून मुख्यमंत्री बसवराज बोम्मई यांनी हल्लाबोल केला.
काँग्रेसमुळे बेंगळुरू चे मोठे नुकसान झाले असून बेंगळूरमधील अतिक्रमण आणि राजकालव्याच्या कामकाजात झालेल्या गोंधळाला काँग्रेस कारणीभूत असल्याचा आरोप मुख्यमंत्र्यांनी केला.
भ्रष्टाचार आणि काँग्रेस हे एकमेकांचे अविभाज्य घटक असून भ्रष्टाचाराचे दुसरे नाव म्हणजे काँग्रेस असल्याची टीका मुख्यमंत्र्यांनी केली. काँग्रेस नेत्यांनी भ्रष्टाचारात पीएचडी मिळवली आहे. काँग्रेसने केलेला भ्रष्टाचार झाकण्यासाठी काँग्रेस नेते भ्रष्टाचाराविरोधात आंदोलन करण्याचे नाटक करत असल्याचा टोला मुख्यमंत्री बसवराज बोम्मई यांनी लगावला.
काँग्रेसने जर एका ठिकाणी आंदोलन केले तर आंदोलक जमा होणार नाहीत म्हणूनच विविध ठिकाणी कार्यकर्त्यांना घेऊन काँग्रेस नेते आंदोलन करणार आहेत. लोकायुक्तांसारखी स्वतंत्र लोकशाहीवादी यंत्रणा भ्रष्टाचार झाकण्यासाठीच बंद करून एसीबीला अधिकार देऊन अनेक प्रकरणे मागे घेतली.
अशी प्रकरणे भाजपच्या कार्यकाळात पुन्हा लोकायुक्त यंत्रणा सुरु करून तपासासाठी वर्ग करण्यात येत आहेत. यामुळे काँग्रेसने केलेला भ्रष्टाचार बाहेर पडेल असा दावा मुख्यमंत्र्यांनी केलाय.
