जिल्हाभरात लंपी स्किन रोगाने गाईंचा मृत्यू होत असल्यामुळे अन्य जनावरांना या रोगापासून दूर ठेवण्यासाठी खबरदारी म्हणून जिल्हा प्रशासनाने गेल्या 5 महिन्यापासून जनावरांचा आठवडी बाजार बंद ठेवला आहे.
मात्र आता पशुपालकांची गैरसोय व कुचंबना लक्षात घेऊन गाई वगळता अन्य जनावरांच्या विक्रीसाठी हा आठवड्याचा बाजार सुरू करावा अशी मागणी बेळगाव जिल्हा कृषी आधारित पशुविक्रेते कल्याण विकास संघटनेने जिल्हाधिकाऱ्यांकडे केली आहे.
बेळगाव जिल्हा कृषी आधारित पशुविक्रेते कल्याण विकास संघटनेच्या पदाधिकारी व सदस्यांनी उपरोक्त मागणीची निवेदन आज बुधवारी जिल्हाधिकाऱ्यांना सादर केले. लंपी स्किन रोगाने राज्यभरात धुमाकूळ घातला आहे.
हजारो गाई या रोगाला बळी पडले आहेत. त्यामुळे लंपीग्रस्त गाईंच्या संपर्कात येऊन अन्य जनावरांना त्या रोगाचा संसर्ग होऊ नये यासाठी प्रशासनाने गेल्या 5 महिन्यापासून जनावरांची खरेदी-विक्री होणाऱ्या आठवड्याच्या बाजारावर बंदी घातली आहे. मात्र यामुळे शेतकरी व पशुपालक अडचणीत आले आहेत. कृषी उत्पन्न बाजार समितीच्या आवारात दर शनिवारी तसेच हिरेबागेवाडी येथे दर मंगळवारी जनावरांचा आठवडी बाजार भरत होता. या ठिकाणी जनावरांची खरेदी -विक्री होत होती. मात्र आता हा बाजार बंद झाल्यामुळे जनावरांची खरेदी -विक्री करण्यात मोठी अडचण निर्माण झाली आहे.
आता लंपी स्किनचा संसर्ग निवळला असल्यामुळे हा जनावरांचा बाजार सुरू करण्यास परवानगी द्यावी, अशा तपशील जिल्हाधिकाऱ्यांना सादर करण्यात आलेल्या निवेदनात नमूद आहे. निवेदन सादर करतेवेळी चंद्राप्पा पवार, कलाप्पा पाटील, संतोष तेली, सिद्धाप्पा धामणे आदी उपस्थित होते.
