सर्वोच्य न्यायालयात पुन्हा ‘तारीख पे तारीख’ सत्र सुरु झाले असून अंतिम टप्प्यात असणाऱ्या सुनावणीची ३० नोव्हेंबर रोजीची तारीख देखील पुढे ढकलण्यात आली आहे. सदर याचिकेवर पुढील सुनावणी कधी होणार? याबाबत शुक्रवार दि. २ डिसेंबर रोजी चित्र स्पष्ट होणार आहे.
सर्वोच्च न्यायालयाच्या सुनावणीची दीर्घकाळ प्रतीक्षा पाहणाऱ्या सीमावासीयांना पुन्हा काही वेळ वाट पहावी लागणार आहे. सर्वोच्च न्यायालयात सीमाप्रश्नी महाराष्ट्राची बाजू भक्कमपणे मांडण्यासाठी सर्व तयारी झाली असून याबाबत वकिलांनाही माहिती पुरविण्यात आली आहे. कर्नाटकाने सर्वोच्च न्यायालयात खोडसाळपणे केलेल्या १२ (अ) या अर्जावर सरन्यायाधीश लोढा यांच्यासमोर झालेल्या सुनावणीत कर्नाटकाचा अर्ज फेटाळण्यात आला होता. मात्र कर्नाटकाने हा निर्णय अमान्य करत त्यांच्या निवृत्तीची वाट पाहिली आणि त्यानंतर सरन्यायाधीश दीपक मिश्रा यांची नियुक्ती झाल्यानंतर आपल्या अर्जाचा पुनर्विचार करण्याची मागणी करत पुन्हा अंतरिम अर्ज दाखल करून घेण्याची विनंती केली. २३ जानेवारी २०१७ रोजी यावर वकील हरीश साळवे यांच्या उपस्थितीत ४० मिनिटे युक्तिवाद करण्यात आला. त्यानंतर तारीखच जाहीर करण्यात आली नाही. त्यानंतर कोविड मुळे २ वर्षे तारीख पडली नाही. युक्तिवादादरम्यान वकिलांनी कर्नाटकाचा हा मुद्दा निरर्थक असल्याचे सांगितले. कागदोपत्री पाहिल्यास कर्नाटकाचा हा अर्ज फेटाळणे आवश्यक आहे, अशी माहिती तज्ज्ञांनी दिली आहे.
सीमाप्रश्नी सर्वोच्च न्यायालयात बुधवारी होणारी सुनावणी खंडपीठातील न्यायमूर्ती के. एम. जोसेफ दुसर्या खटल्यात व्यस्त असल्यामुळे लांबणीवर पडली आहे. सीमाप्रश्नी ३० ऑगस्ट रोजी सुनावणी झाली होती. त्यावेळी कर्नाटकाने वेळ मागून घेतली. त्यामुळे २३ नोव्हेंबर रोजी सुनावणीची तारीख देण्यात आली होती. पण, २३ नोव्हेंबर रोजी त्रीसदस्यीय खंडपीठातील एक न्यायमूर्ती दुसर्या खटल्यात व्यस्त असल्यामुळे सुनावणी होऊ शकली नाही.
आज सुनावणी होणार होती. पण, न्यायमूर्ती जोसेफ हे अन्य खटल्यात व्यस्त असल्यामुळे सुनावणी झाली नाही. दरम्यान या दाव्यासाठी नव्या खंडपीठाची स्थापना करण्यात आली होती. तरीही एक न्यायमूर्ती अन्य खटल्यात व्यस्त राहिल्याने सुनावणी लांबणीवर पडली आहे.
आता अंतिम टप्प्यात असलेला सीमाप्रश्न सर्वोच्च न्यायालयात लवकरच निकाली लागेल, अशी आशा सीमावासीय करत असून २ डिसेंबर रोजी पुढील सुनावणीची तारीख समजणार आहे.
