ताल जल्लोष -2022 या आपण आयोजित केलेल्या भव्य ढोल ताशा स्पर्धेदरम्यान जखमी झालेल्या ध्वजधारी युवतीची आमदार ॲड. अनिल बेनके यांनी स्वतः तिच्या घरी जाऊन विचारपूस केली. आमदारांनी दाखवलेल्या या आत्मीयतेची सर्वत्र प्रशंसा होत आहे.
नवरात्रोत्सव आणि दसरा सणानिमित्त बेळगाव उत्तरचे आमदार ॲड. अनिल बेनके ताल जल्लोष -2022 ही भव्य बक्षीस रकमेची ढोल ताशा स्पर्धा नुकतीच यशस्वीरित्या पार पडली. या स्पर्धेदरम्यान ढोल ताशा वादनाचे सादरीकरण करताना एकदंत ढोल -ताशा पथकातील ध्वज धारक कु. प्रितमी मजुकर जखमी झाली होती.
सादरीकरणाप्रसंगी तोल जाऊन ध्वजासहित कोसळलेल्या प्रीतमी हिच्या डोक्याला दुखापत झाली आहे. स्पर्धेदरम्यान हा अपघात घडताच प्रीतमीला तात्काळ उपचारासाठी हॉस्पिटलमध्ये दाखल करण्यात आले. दुखापत फारशी गंभीर नसली तरी सध्या तिच्यावर उपचार सुरू आहेत. मात्र दरम्यान स्पर्धेचे आयोजक आणि लोकप्रतिनिधी या नात्याने आपले कर्तव्य पार पाडताना आमदार अनिल बेनके यांनी लागलीच दुसऱ्या दिवशी स्वतः शहापूर येथील प्रीतमी मजुकर हिच्या घरी जाऊन तिची भेट घेतली. तसेच तिच्या तब्येतीची विचारपूस करून कोणतीही मदत लागल्यास आपल्याशी संपर्क साधावा, असे सांगून त्यांनी मजुकर कुटुंबीयांना धीर दिला.
प्रीतमी हातात भगवा ध्वज घेऊन खेळतेवेळी जखमी झाली होती जखमी असताना तिला स्वतःच्या जखमेपेक्षा भगवा ध्वजाची काळजी अधिक दाखवली होती या भगव्या प्रेमाचे देखील कौतुक स्पर्धेत झाले होते.
एखादी स्पर्धा समाप्त झाल्यानंतर बक्षीस वितरण झाले की सहसा स्पर्धेचे आयोजक आणि स्पर्धेत सहभागी संघ आपापल्या वाटेने निघून जातात. तथापि आमदार ॲड. बेनके यांनी आदर्शवत कृती केली आहे. स्पर्धेचे आयोजक या नात्याने स्पर्धा समाप्त झाल्यानंतर गप्प न बसता जबाबदार लोकप्रतिनिधी या नात्याने आपण आयोजित केलेल्या स्पर्धेत जखमी झालेल्या स्पर्धकाची त्यांनी जातीने भेट घेऊन आत्मीयतेने विचारपूस केली. त्यामुळे त्यांच्या या कृतीची सर्वत्र प्रशंसा होत आहे.
