बेळगाव शहर पोलीस आयुक्तालयाकडून आरटीओ सर्कलच्या दिशेने जाणारी एक खाजगी प्रवासी बस ब्रेक फेल झाल्यामुळे थेट फुटपाथवरून आवार भिंत तोडून रस्त्याशेजारी इमारतीला जाऊन धडकल्याची घटना आज सोमवारी सकाळी घडली.
ब्रेक फेल झालेली बस शहरातील क्रांतिवीर संगोळी रायण्णा सर्कल (आरटीओ सर्कल) नजीक असलेल्या पोलीस खात्याच्या नूतन इमारतीला जाऊन धडकली. आवार भिंत तोडून इमारतीला जाऊन धडकलेली बस पाहण्यासाठी बघ्यांची गर्दी झाली होती.
सदर अपघात घडला त्यावेळी सुदैवाने त्या खाजगी प्रवासी बसमध्ये कोणीही प्रवासी नव्हता, त्यामुळे कोणतीही दुर्घटना घडली नाही.
ब्रेक फेल झाल्याचे लक्षात येताच बस चालकाने समोर असलेल्या श्री हनुमान मंदिराला वाचविण्याच्या प्रयत्नात रस्त्याशेजारील पोलीस इमारतीला धडक दिली.
सदर अपघात घडला त्यावेळी भल्या सकाळची वेळ असल्यामुळे या रस्त्यावर सुदैवाने फारशी रहदारी तसेच पादचाऱ्यांची ये -जा नव्हती अन्यथा अनर्थ घडण्याची शक्यता नाकारता येत नव्हती.
