Friday, May 24, 2024

/

लंपी स्किनमुळे जुने बेळगावात दुभत्या गाईचा मृत्यू

 belgaum

लंपी स्किन रोगाचा कहर शहरांमध्येही सुरू होणार की काय? अशी भीतीयुक्त शंका व्यक्त केली जात असून काल गुरुवारी सराफ गल्ली मागोमाग रात्री कोरवी गल्ली जुने बेळगाव येथे एका दुभत्या गाईचा लंपी स्कीनमुळे मृत्यू झाला.

सदर गाय कोरवी गल्ली जुने बेळगाव येथील शेतकरी गजानन कोकितकर यांच्या मालकीची होती. गाईला वाचविण्यासाठी वडगाव येथील पशु संगोपन खात्याचे वैद्य डॉ. कट्ट्यण्णावर यांनी शेवटपर्यंत शर्तीचे प्रयत्न केले परंतु दुर्दैवाने त्यांच्या प्रयत्नांना यश आले नाही आणि रात्री 8 च्या सुमारास गाय दगावली. एचएफ जर्सी जातीची ही दुभती गाय दररोज 12 ते 14 लिटर दूध देत होती. अलीकडेच ती व्यायली देखील होती. या गायीच्या मृत्यूमुळे गजानन कोकितकर यांचे सुमारे 60 हजार रुपयांचे नुकसान झाले आहे. लंपी स्कीनमुळे शहरात या पद्धतीने काल दोन गाईंचा मृत्यू झाला. काल गुरुवारी सकाळी शहापूर सराफ गल्ली येथे एक गाय लंपीमुळे दगावली.

एकंदर बेळगाव शहरात लंपी स्कीन झपाट्याने वाढत असल्याची चिन्हे दिसू लागल्याने शेतकऱ्यांमध्ये मोठी धास्ती निर्माण झाली आहे. प्रत्येक जण गोठा स्वच्छ ठेवण्याबरोबरच कडुनिंब पाल्याच्या धुरीचा अवलंब करू लागला आहे. लंपी स्कीन वाढत असला तरी शेतकऱ्यांनी घाबरून जाऊ नये. वेळीच उपचार केल्यास हा रोग बरा होऊ शकतो.

 belgaum

जुने बेळगाव येथे जवळपास 11 जनावरांना या रोगाची लागण झाली होती. तथापि दुर्दैवाने कोकितकर यांची गाय वगळता सर्व जनावरे बरी झाली आहेत हे लक्षात घेतले पाहिजे. तेंव्हा गोठा व घरचा परिसर स्वच्छ ठेवण्याबरोबरच गोठ्यात कडुनिंबाचा धूर करण्याचा उपाय शेतकऱ्यांनी सुरू ठेवावा.

या खेरीज जर का आपल्या जनावरांमध्ये कांही बदल जाणवला. गाय किंवा बैल नेहमीप्रमाणे चारा खात नसेल, त्यांच्यात अशक्तपणा आला असेल, ताप जाणवत असेल वगैरे प्रतिकूल लक्षणे आढळल्यास शेतकऱ्यांनी घाबरून न जाता तात्काळ नजीकच्या पशु चिकित्सालयाशी संपर्क साधावा, असे आवाहन शेतकरी नेते राजू मरवे यांनी केले आहे.

 belgaum

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.