बेळगाव आणि बेळगावची बातच न्यारी! एकदा येथे आलेला माणूस हा कायमचा रमला नाही तरच नवल.. बेळगावचे हवामान, खाद्यपदार्थ, येथील लोक, संस्कृती आणि एकंदर वातावरण इतके मंत्रमुग्ध करणारे आहे कि हे शहर सोडून इतर ठिकाणी वास्तव्य करणे बेळगावकरांसाठी तरी कठीण आहे.
परंतु काही कारणास्तव बेळगाव सोडून अन्यत्र स्थिरावणाऱ्या बेळगावकरांना मात्र नेहमीच बेळगावची चाहूल लागते. बेळगावमध्ये सुट्टीचे दिवस घालवणं हे बेळगावकरांसह आसपासच्या राज्यातील लोकांनाही आवर्जून वाटतं.
नोकरी, लग्न यासह इतर अनेक कारणांमुळे बेळगाव सोडून इतरत्र स्थायिक झालेले बेळगावकर एका व्हॉट्सअप ग्रुपच्या माध्यमातून एकत्रित येणार आहेत. सोशल मीडियाचा असाही एक फायदा हल्ली होत आहे.
बेळगावमधून काही कारणास्तव पुणे या शहरात स्थायिक झालेल्या बेळगावकरांनी बीआयपी या व्हॉट्सअप ग्रुपच्या माध्यमातून बेळगावमध्ये स्नेहमेळावा करण्याचे ठरविले आहे. सर्व बेळगावकरांना एकाच छताखाली आणण्यासाठी या ग्रुपची निर्मिती करण्यात आली असून २०१४ मध्ये तयार करण्यात आलेल्या या ग्रुपवर आज २०० हुन अधिक सदस्य आहेत. गरजेच्या वेळी एकमेकांना मदत करणे या मुख्य उद्देशाने या ग्रुपची निर्मिती करण्यात आली असून लॉक डाऊन काळात अनेकांना हा ग्रुप उपयुक्त ठरला आहे.
रक्तदान, अडलेल्या नडलेल्या वेळेत एकमेकांना सहकार्य करणे, घर शोधणे, साहित्य शिफ्ट करणे, अन्नधान्य पुरवठा, गावी गेल्यास आपल्या सहकाऱ्याच्या घरातील निरोप, साहित्य पोच करणे यासह अनेक उपयुक्त गोष्टी या ग्रुपमधील सदस्यांमार्फत एकमेकांसाठी करण्यात येतात. हा ग्रुप सुरु झाला आणि नकळत या ग्रुपच्या माध्यमातून आजवर अनेकांना सहकार्य मिळाले आहे. आता हे सर्व सदस्य बेळगावमध्ये स्नेहमेळाव्याच्या माध्यमातून एकत्रित येणार आहेत.
खानापूर मधील पुणेकर दरवर्षी स्नेह मेळाव्यानिमित्त एकत्र येत असतात खानापूर रहिवासी संघ देखील अस्तित्वात आहे पुण्यासारख्या शहरांमध्ये खानापूर तालुक्यातील लोक अनेक कार्यक्रम घेत असतात आता आता पुण्यात राहणारे बेळगावकर देखील एकत्र येणार आहेत.
