मजगाव येथील आदिनाथ भवनानजीक गेल्या गुरुवारी उघडकीस आलेल्या 27 वर्षीय यल्लेशप्पा शिवाजी कोलकार या युवकाच्या खून प्रकरणी उद्यमबाग पोलिसांनी 4 जणांना ताब्यात घेतले आहे.
आंबेडकरनगर मजगाव येथील यल्लेशप्पा कोलकार पेंटिंगचे काम करत होता. गेल्या बुधवारी रात्री 11:30 ते गुरुवारी सकाळी 7.30 च्या दरम्यान त्याचा अज्ञातांनी धारदार शस्त्राने सपासप वार करून निघून खून केल्याचे उघडकीस आले होते.
याप्रकरणी यल्लेशप्पा याची बहिण सविता मेत्री यांनी पोलिसात फिर्याद दिली होती. त्यानुसार पोलिसांनी अज्ञातांविरोधात खुनाचा गुन्हा दाखल करून घेतला होता.
यल्लेशप्पा याचा खून कोणी व कशासाठी केला? याबाबत पोलीस आयुक्त डॉ. एम. बी. बोरलिंगय्या यांच्या मार्गदर्शनाखाली आणि उद्यमबाग पोलीस ठाण्याचे पोलीस निरीक्षक धीरज शिंदे यांच्या नेतृत्वाखाली पोलिसांनी तपास चक्रे गतिमान केली आहेत.
सध्या यल्लेशप्पा यांच्या खून प्रकरणी पोलिसांनी 4 जणांना ताब्यात घेऊन चौकशी सुरू केली आहे. त्यामुळे या खून प्रकरणाचा उलगडा लवकरच होण्याची शक्यता आहे.