महाराष्ट्राच्या कोकण प्रदेशामध्ये भारी मुसळधार पाऊस पडत असल्यामुळे बेळगाव जिल्ह्यातील नद्यांना पूर आला आहे. पार्श्वभूमीवर जिल्हाधिकारी नितेश पाटील, जिल्हा पोलीस प्रमुख संजीव पाटील आणि जिल्हा पंचायत सीईओ दर्शन एच. व्ही. यांनी आज बुधवारी सकाळी कृष्णा नदी काठचा पाहणी दौरा केला.
बेळगाव जिल्ह्यातील चिक्कोडी विभागात असलेल्या दूधगंगा, वेदगंगा आणि कृष्णा या नद्यांनी धोक्याची पातळी ओलांडली आहे कृष्णा नदीपात्रातून सध्या 1 लाख क्युसेक्स पाणी वाहत आहे.
या पार्श्वभूमीवर पूर परिस्थितीच्या बाबतीत गंभीर असलेल्या जिल्हाधिकारी नितेश पाटील यांनी आज सकाळी जिल्हा पोलीस प्रमुख संजीव पाटील, आणि जि. पं. सीईओ दर्शन एच. व्ही. या प्रमुख अधिकाऱ्यांसमवेत दुथडी भरून वाहणाऱ्या कृष्णा नदी काठाला भेट देऊन पाहणी दौरा केला.
चिक्कोडी तालुक्यातील अंकली, कल्लोळ, मांजरी या गावांना भेटी देणाऱ्या या अधिकाऱ्यांनी तेथील भयभीत नागरिकांना धीर देण्याचे काम केले.
या अधिकाऱ्यांनी कृष्णा नदीच्या पुरामुळे धोका असणाऱ्या गावांनाही भेटी देऊन पाहणी केली. कृष्णा नदीवरील मांजरी पुलासह पूरग्रस्तांसाठी उभारण्यात आलेल्या निवारा केंद्रांना भेटी देऊन अधिकाऱ्यानी आवश्यक सूचना केल्या. दरम्यान, पूर परिस्थिती हाताळण्यासाठी जिल्हा प्रशासनाकडून आवश्यक सर्व तयारी करण्यात आली असून एनडीआरएफ पथके तैनात करण्यात आली आहेत.
मुसळधार पावसामुळे बेळगाव जिल्ह्यातील 317 घरांची हानी झाली आहे. यापूर्वी पुरामुळे घरांचे नुकसान झालेल्यांच्या खात्यांवर नुकसान भरपाईची रक्कम जमा करण्यात आली आहे, असे जिल्हाधिकारी नितेश पाटील यांनी यावेळी सांगितले.
