बेळगावचे सब रजिस्ट्रार कार्यालय नेहमी या ना त्या कारणास्तव चर्चेत असते. आता या सरकारी कार्यालयात चक्क एका अनाधिकृत दलालाचा (एजंट) साजरा करण्यात आलेला वाढदिवस सध्या चर्चेचा विषय बनला आहे.
बेळगाव सब रजिस्ट्रार कार्यालयाकडे वरिष्ठ अधिकाऱ्यांचे लक्ष आहे की नाही अशी परिस्थिती सध्या निर्माण झाली आहे. मिळालेल्या माहितीनुसार या कार्यालयातील मॅरेज टेबल, एसी टेबल आदी जबाबदारीच्या विभागांची कामे अनाधिकृत लोकांकडून हाताळली जात असल्याचे बोलले जात आहे.
याच अतिउत्साही लोकांकडून सब रजिस्ट्रार कार्यालयाशी संबंधित एका दलालाचा वाढदिवस नुकताच कार्यालयात साजरा करण्यात आला.
हा प्रकार सध्या चर्चेचा झाला असून सरकारी कार्यालय अशाप्रकारे दलालांसारख्या अनधिकृत लोकांचे वाढदिवस साजरे करण्यासाठी आहेत का? असा संतप्त सवाल केला जात आहे.
त्याचप्रमाणे बाहेरील लोकांचा सब रजिस्टर कार्यालयातील हस्तक्षेप मोठ्या प्रमाणात वाढला असून कार्यालयातील वरिष्ठांच्या आशीर्वादामुळे बरीचशी सरकारी कामे त्यांच्याकडूनच केली जात असल्याचा आरोप केला जात आहे. तरी लोकप्रतिनिधींसह संबंधित वरिष्ठ अधिकाऱ्यांनी याकडे गांभीर्याने लक्ष देऊन योग्य ती कार्यवाही करण्याची गरज व्यक्त केली जात आहे
