पोलिस भरतीमध्ये तृतीयपंथीयांसाठी जागा राखीव ठेवण्याच्या ऐतिहासिक निर्णयानंतर आता यावेळी पहिल्यांदाच शिक्षक भरती प्रक्रियेत तृतीयपंथीयांना आरक्षण देण्यात आले आहे.
शिक्षण खात्याकडून राज्यात 15 हजार शिक्षकांची भरती केली जाणार असून यात 1 टक्के जागा तृतीयपंथीयांसाठी राखीव ठेवल्या आहेत. राज्यात पदवीधर शिक्षकांच्या 15 हजार जागा भरण्यासाठीची अधिसूचना 23 फेब्रुवारी रोजी जारी झाली आहे.
राज्यातील सर्व सरकारी शाळांमधील शिक्षकांच्या रिक्त जागा भरती प्रक्रियेतून भरल्या जातील. अधिसूचनेत 1 टक्के जागा तृतीयपंथीयांसाठी राखीव असल्याचे नमूद आहे. अर्थात भरतीसाठी आवश्यक शैक्षणिक पात्रता असणारे किती तृतीयपंथीय राज्यात आहेत याची माहिती शिक्षण खात्याकडे नाही.
यावेळी शिक्षक भरती प्रक्रियेत तृतीयपंथीयांच्या वाट्याला 150 जागा येतील. सदर राखीव 150 जागांसाठी अद्याप अर्ज दाखल झाले नाहीत, त्यामुळे या 150 जागा न भरल्यास त्या अन्य प्रवर्गासाठी खुल्या होतील.
शिक्षक भरतीत 1 टक्का आरक्षण वगळता अन्य कोणतीही सूट तृतीयपंथीयांना दिली जाणार नाही. त्यांच्याकडे बीएड ही शिक्षण शास्त्रातील पदवी तसेच ते टीईटी उत्तीर्ण झालेले असणेही आवश्यक आहे. त्याचप्रमाणे या भरतीसाठी लवकरच शिक्षण खात्याकडून परीक्षा घेतली जाणार आहे.
